Алматы қаласы хайуанаттар бағының әкімшілігі арыстандарға аққала жасап берді, деп хабарлайды Ulysmedia.kz.
Бұл туралы зообақтың әлеуметтік желідегі парақшасында видео тарады.
“Бүгін Алматыны ерекше қар басты. Қыстың осы бір ғажайып сәтін біз тиімді пайдаланып, тосынсый жасағымыз келді. Біз зообағымыздағы арыстандар – Арсик пен Лилиге аққала жасап бердік”, деп жазды әлеуметтік желідегі ақпаратта.
Дегенмен шағын ғана аққала көп тұрмады. Жер шарының қар жаумайтын белдеуіне тән тіршілік иелері әппақ тосынсыйға таңырқай қарап, бірден қиратып тастады. Тіпті Арсик пен Лили қардың дәмін де татып көрді.
“Ең бастысы – аққаланың қанша уақыт тұрғанында емес, ең бастысы – африкалық арыстандарымыз қар ұстап, аққаламен ойнап көрді!”, деп жазды зообақ әкімшілігі.
Ал видео астындағы пікір иелерінің басым бөлігі бұл көрініске ризашылықтарын білдірген. Тіпті бір оқырмен аққаланы еттен жасап беру туралы ұсынысын жолдапты.
