Еліміздегі жастар саясатының дамуы мен қоғам игілігі жолында елеулі үлес қосқан өрендерге «Рухтастар» сыйлығы табысталды. «AMANAT» партиясының Атқарушы хатшысы Дәулет Кәрібек атап айтқандай Әділетті Қазақстан білімді әрі еңбекқор жастардың күшімен құрылады. «Рухтастар» сыйлығы өздерін дәлелдеген белсенділер мен волонтерлерді ынталандырып қана қоймай, олардың үлгісін өзге жастарға көрсетіп, жаңа жетістіктерге шабыттандырады және ортақ мақсаттарға біріктіреді. Осымен үшінші рет өткізіліп отырған байқауға 500-ге жуық өтінім түскен. Соның ішінде жүзден жүйрік атанғандар 8 номинация бойынша марапатталды. Жеңімпаздарға статуэткалар мен дипломдар және арнайы сыйлықтар берілді.
ЕЛДАР ҚАНАФИЯНОВ, "ҚАЙСАР" ЖЫЛ БАТЫРЫ НОМИНАЦИЯСЫ ИЕГЕРІ:
Қостанай, Тобыл қалаларында сонымен қатар батыс Қазақстан облысында болған су тасқыны кезінде Төтенше жағдай қызметі министрліктің атынан жұмыс істеген болатынбыз. Сондықтан осындай біздің өзіміздің жұмыстарымызды көрсеттік. Еңбегімізді бағалап біздіде осындай марапаттап жатқанына көңіліміз толады. Қуаныштымыз.
«AMANAT» партиясының жастар қанатының кезектен тыс VI Съезінде Қазақстан Президенті Қасым-Жомарт Тоқаев жастар үшін үш маңызды басымдықты атап өтті – білімге ұмтылу, еңбекқорлық және патриотизм. Сол кезде жастар қанатын трансформациялау бағдарламасы қабылданды. Мемлекет басшысының реформалар бағытына жастарды топтастырып, оларды қоғамдық қызметке ынталандыру тапсырылған еді. «Жастар Рухы» жастар қанатының «Рухтастар» сыйлығы дәл осы міндетті атқарып отырған шаралардың бірі. Салтанатты жиында белсенділер мен волонтерлер ғана емес нағыз еңбек адамдарының да еңбегі бағаланды.
СҰЛТАН ӘУКЕН, "ЫСТЫҚ ҚАЙРАТ" ЕҢБЕК АДАМЫ НОМИНАЦИЯСЫ ИЕГЕРІ:
Аяқ астынан менің суретімді шығарып менің аты-жөнімді атаған кезде мен өзім сенбей қалдым басында. Әлі қобалжып тұрмын. Бәріне рақмет айтқым келеді.
