Астанада келер жылы жатақхана мәселесі түбегейлі шешіледі. Ғылым және жоғары білім министрі Саясат Нұрбек елордада 27 студент үйі салынып жатқанын айтты. Жыл аяқталар тұста астаналықтармен кездескен министр саладағы жаңалықтармен бөлісті. Айтуынша, елімізде шетелдік мықты 20-дан аса университеттің филиалы ашылған. Қазір 30 мың білім алушы елге келіп үлгерді. Алдағы үш жылда олардың санын 100 мыңға жеткізу жоспарланған. Студенттердің әрқайсысы 10 мың доллардан, яғни жылына 100 млн доллар кіріс әкеледі дейді, министр. Жалпы елде білім және ғылым саласын жоғары деңгейге көтеру жұмыстары қарқынды жүріп жатыр.
САЯСАТ НҰРБЕК, ҚР ҒЫЛЫМ ЖӘНЕ ЖОҒАРЫ БІЛІМ МИНИСТРІ:
Өте маңызды заңдар қабылданды биыл. Ғылым және технологиялық саясат туралы заң қабылданып, қазіргі таңда ғылымның жаңа моделіне көш басталды. Енді біздің ғалымдарымыз, ғылыми зерттеу институттарымыз, ЖОО-мыз тікелей өндірістік компаниялармен байланыста болып, негізгі қаржыландыру, негізгі гранттық жобаларымыз енді өндірістік үлкен зауыттардың проблемаларын шешуге бағытталған.
