Джо Байден Америка президенті ретінде халықты соңғы рет Рождество мерекесімен құттықтады, - деп жазды KAZINFORM.
- Мен үшін бүкіл Американы президент ретінде соңғы рет бақытты Рождество мерекесімен құттықтау - үлкен мәртебе. Халқымыз бүгін де, әрқашан да еркіндік пен махаббаттың, мейірім мен жанашырлықтың, ізеттілік пен әдептілік нұрына ұмтылады деп сенемін. Баршаңызға Құдай разы болсын. Халқымызға мейрамның тыныштығы мен нұры жаусын. Рождество мерекесі құтты болсын, - деп жазды Джо Байден президенттік @POTUS X аккаунтында.
Жаңадан сайланған президент Дональд Трамп та Truth Social әлеуметтік желісінде өз азаматтарын былай құттықтады: «Бұл біздің өміріміздегі ең жақсы Рождество болады, өйткені алдымызда үлкен істер күтіп тұр!»
Сондай-ақ ол америкалықтарға арнап бейнеүндеу жариялады.
- Мен үшін Құрама Штаттардың президенті ретінде Америка мен әлемді Рождество мерекесімен құттықтау – үлкен мәртебе. Біз Рождествоның шынайы рухы бізде бар нәрсе екенін түсінеміз. Бұл біздің кім екенімізді білдіреді. Әрқайсымыз – Құдайдың баласымыз. Жылдың осы уақыты - нағыз қуаныш көзі. Бұл әр Рождествоны көңілді етеді. Жылдың осынау қасиетті мезгілінде жүректеріміз Исаны бізге жібергені үшін Құдіреті шексіз Құдайға алғыс пен мадақтауға толы сөздерімізді арнаймыз. Ол өзінің ұлын дүниенің кінәсін өтеу үшін жіберді. Бүгін түнде біз Құдайдан осы ұлтты жарылқауын сұраймыз және біз әрбір америкалық азаматтың отбасына Рождествода қуаныш, үміт пен тыныштық сыйлауын сұраймыз, - деді Трамп.
