Биыл Сенат елдің саяси және әлеуметтік-экономикалық орнықты дамуын қамтамасыз етуге, халықтың осал топтарын қорғауға және басқа да маңызды міндеттерді іске асыруға арналған 104 заң қабылдады. Бұл туралы Жоғары палатаның жұмысын қорытындылаған Сенат спикері Мәулен Әшімбаев айтты. Демографиялық өсу мәселесіне қатысты Үкімет сағаты және 150-ден астам «дөңгелек үстел» ұйымдастырылды. Маңызды мәселелер бойынша депутаттар Үкіметке 180-ге жуық депутаттық сауал жолдаған. Енді ертеңнен бастап сенаторлардың өңірлерге сапарлары басталады.
МӘУЛЕН ӘШІМБАЕВ, ҚР ПАРЛАМЕНТІ СЕНАТЫНЫҢ ТӨРАҒАСЫ:
Сапар кезінде тұрғындарды алаңдатқан өзекті мәселелерге баса мән беруіміз керек. Халыққа қабылданған заңдардың маңызын да кеңінен түсіндірген жөн. Келесі жылы Сенат Президентіміз Қасым-Жомарт Кемелұлы Тоқаевтың тапсырмасына сәйкес әзірленген жаңа Бюджет, Салық, Су, Құрылыс кодекстерін қарайды. Бұл құжаттардың еліміз үшін маңызды екенін ескере отырып, оларды мұқият пысықтауымыз қажет.
