Биыл Қазақстан аймақтық және халықаралық алты ұйымға төрағалық етті. Бұл елімізді саяси аренадағы беделі мен имиджін арттыра түсті. Өйткені Қазақстан ұйымдарға төрағалық етіп қана қойған жоқ. Ұйым жұмысын жетілдіру үшін түрлі ұсыныстарын енгізді. Бұл Қазақстанды «Орта держава» ретінде танытуға мүмкіндік берді.
Қазақстан татулықты ту еткен бейбіт ел. Сыртқы саясатын да осы бағытта жүргізіп келеді. Соның арқасында талай жеткістікке жетті. Мәселен биыл Қазақстан Шанхай ынтымақтастық ұйымына төртінші рет төрағалық етті. Айтпақшы, ұйым осы жолы Беларусь мемлекетімен толықты. Бұдан бөлек, маңызды бас қосуда Астана декларациясы қабылданды.
Андрей ДЕНИСОВ, РЕСЕЙ ФЕДЕРАЦИЯСЫ КЕҢЕСІНІҢ ХАЛЫҚАРАЛЫҚ ІСТЕР ЖӨНІНДЕГІ КОМИТЕТІ ТӨРАҒАСЫНЫҢ БІРІНШІ ОРЫНБАСАРЫ:
Халықаралық ұйымдар өздерінің сындарлы рөлін айқындады. Жиын ұйымға мүше әр ел үшін маңызды кездесу болды. Мұндай шаралардың маңыздылығы айтпаса да түсінікті. Әлем назары Қазақстанда. Солай болуы да керек. Өйткені бұл нағыз көшбасшылардың отырысы.
Ұжымдық қауіпсіздік туралы шарт ұйымы. Осы жылы Қазақстан төрағалық еткен кезеңде 11 жыл бойы түйіні тарқамай келе жатқан маңызды мәселе шешімін тапты. Ол – Тәжік-ауған шекарасын нығайту жайы. Биыл осы сұрақ бойынша ұйымның мақсатты мемлекетаралық бағдарламасын дайындау жұмыстары аяқталды. Құжатты әзірлеу 2013 жылы басталған болатын. Сонымен қатар, жиында әскерлердің әлеуетін күшейту және төтенше жағдайлар кезінде әскери еріктілерді жұмылдыру мәселесі де қаралды. Киберқауіпсіздік де шет қалмады.
2Мұхтар СЕРІКБАЕВ, ӘСКЕРИ САРАПШЫ:
Қазақстан 1 қаңтардан бастап осы ұйымға төрағалық етті. Келесі жылы еліміз бұл міндетті Қырғызстанға тапсырады. Бұл жиында маңызды мәселелер қабылданды. Бұл еліміздің саяси салмағын арттыруы сөзсіз.
Түркі мемлекеттері ұйымы аясындағы өзара сауда айналымы биыл 45 миллиард доллардан асқан. Өткен жылы ұйымның 10-шы саммиті Қазақстанда өткен еді. Биыл бұл бас қосу Қырғыстан елінде өтті. Саммит соңында тараптар 8 түрлі құжатқа қол қойды.
Қасым-Жомарт ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Қазақстан Ұйымның іс басындағы төрағасы ретінде «TURKTIME!» ұранын көтерді. Түбі бір түркі жұртын біріктіруге баса мән бердік. Жан-жақты ынтымақтастықты кеңейтуге ерекше назар аудардық. Осы уақыт аралығында нақты жетістіктерге қол жеткіздік. Бірқатар жобаны жүзеге асырдық. Түркі әліпбиінің ортақ нұсқасы бекітілді. Мұны тарихи оқиға деуге болады.
Біз төрағалық еткен тағы бір ұйым Азық-түлік қауіпсіздігі жөніндегі Ислам ұйымы. аталған ұйым осыдан 10 жыл бұрын Қазақстанның бастамасымен құрылған. Бүгінде оған 35-тен астам мемлекет мүше және ол Ислам ынтымақтастығы ұйымы кеңістігінде азық-түлік қауіпсіздігін нығайтуға зор үлес қосып келеді. Осылайша, Қазақстан биыл саяси майданда салмақты мәселелерді көтеріп, әлемдік проблемаларды ұйымдарға мүше мемлекеттермен бірігіп шешуге үндеді. Нәтижесінде алып державалардың өзі Қазақстанмен санаса бастады. Айтпақшы, әлемдегі геосаяси шиеленіс кезінде де Қазақстан бейбітшілік алаңы ретінде танылып келеді.
