Қостанай облысында 11 мектептің құрылысы қарқынды жүргізіліп жатыр. Оның алтауы «Жайлы мектеп» ұлттық жобасы шеңберінде салынуда. Заречный кенті мен Арқалық қаласында заманауи білім ошақтары ашылып, мыңдаған шәкірт білім алып жүр.
Арқалықта бой көтерген жаңа білім ордасы қараша айында ашылды. «Жайлы мектеп» 300 оқушыға арналған. Білім ошағында оқушылардың білім сапасын арттыруға, қабілеттері мен таланттарын ашуға, өскелең ұрпақтың ғылыми және шығармашылық әлеуетін дамытуға бар жағдай жасалған.
ҚҰМАР АҚСАҚАЛОВ, ОБЛЫС ӘКІМІ:
Биыл Заречное ауылы мен Арқалық қаласында осындай екі мектеп ашылды. Тағы 2260 орындыққа 4 мектептің құрылысы аяқталуға жақын. Қалған 4 мың орындық 5 мектеп 2025 жылы іске қосылады. Ағымдағы жылы 155 білім беру нысанын жөндеуге 7,0 млрд. теңге бағытталды.
Ұлттық жобамен Заречный ауылында салынған мектеп 900 оқушының жаңа білім ордасына айналды. Мектепте жүзден астам оқу кабинеті, STEM-зертханасы және робототехника кабинеті жұмыс істейді. Шығармашылық және спорттық әлеуетті дамыту үшін акт залы, хореографиялық зал және үш спорт залы бар.
ЕКАТЕРИНА ГЕДЗУР, МҰҒАЛІМ:
Өте ыңғайлы. Бұл бастауыш сыныптар блогы және жоғары сыныптардың блогы бөлек.Әр блоктың ішінде компьютерлік сыныптар бар.Және де өзінің асханасы, кітапханасы 3 спорт зал бар.Соның ішінде бастауыш сыныптарға арналған спорт залы бар.
Білім жарысында озып шығу үшін осындай жайлы мектептердің орны бөлек. Бұл жерде оқитын оқушының да,жұмыс істейтін мұғалімнің де деңгейі жоғары,талай биікті бағындырары сөзсіз.
ҚЫРМЫЗЫ ЖАҢБЫРШИНА, ОБЛЫСТЫҚ МӘСЛИХАТ ДЕПУТАТЫ, «AMANAT» ПАРТИЯСЫ ҚОФ ЖАНЫНДАҒЫ «MIRAS» АЙМАҚТЫҚ КЕҢЕСІНІҢ ТӨРАҒАСЫ:
Заманауи жөндеуден өткен, заманауи техникамен жабдықталған сондай бір жайлы , әсем, керемет ғимараттарда білім алып жатыр.Бұл әрине балалардың білімге деген ынтасын, тәртіпті болуына, жаңағыдай отансүйгіштік қасиеттерін оятуға бірден бір себебін тигізетіні сөзсіз.
«Жайлы мектеп» ұлттық жобасы аясында алдағы уақытта Рудный, Құсмұрын ауылында және облыс орталығындағы «Әуежай» мен «Береке» шағын аудандарында білім ошақтары ашылады. Облыста мектепке дейінгі мекемелердің көкжиегін кеңейтуге де ерекше назар аударылып отыр.Бір жыл ішінде 7 балабақша салынып, мыңнан астам бүлдіршін қамтылған.
