Батыс Қазақстан облысындағы көктемгі су тасқынының зардабы жойылды. Топан судың кесірінен бүкіл дүние-мүлкінен айрылған үш мыңға тарта отбасы баспанамен қамтылып, шығын шеккен шаруаларға өтемақы төленді.
Саяжайдағы үйі суға кеткен Мағзомовтар отбасы әуелі эвакуациялық орталықты паналапты. Кейін пәтер жалдаған. Қамкөңіл отбасы үйден үмітін үзген кезде керек-жарақтың бәрімен қамтылған жаңа пәтер бұйырды. Енді жаңа қонысымыз құтты мекен болсын деп қуанышын жеткізе алар емес.
АБАТ МАҒЗОМОВ, ТҰРҒЫН:
Қиналдық енді, үйсіз қалдық. Пәтерде жүрдік. Пәтерді де босатыңыз деп жақында айтып қойып еді. Мә, енді қайда барамыз деп жатыр едік. Керемет болды, ойламаған жерден үйлі болып жатырмыз. Алғысымызды айтамыз!
Көктемгі тасқында 13 ауыл мен мыңнан астам үй су астында қалды. Көлік жолдары мен көпірлерді су шайып, қатынас қиындады. Су құрсауында қалған ауылдықтар тікұшақпен көшіріліп құтқарылды. Кейін Жайық арнасына сыймай тосын мінез танытқанда, мыңдаған саяжайды су басты. Бірақ мемлекет олардың ешбірін далада қалдырмады.
БАҚЫТЖАН НАРЫМБЕТОВ, БҚО ӘКІМІНІҢ ОРЫНБАСАРЫ:
Су тасқынынан зардап шеккен тұрғындарға бірінші кезекте берілген көмек 100 АЕК көлемінде 369 мың тг көмек көрсетілген болатын. Бұған бізде 4 млрд 700 млн тг қаражат бөлінді. Ал материалдық көмекке 3 млрд 700 млн тг және мал шығындарына 151 млн тг қаражат өтелді.
Көктемгі тасқынның зардабын жоюға бөлінген 113 млрд теңгенің дені тұрғындарды баспанамен қамтуға жұмсалды. Осылайша суға кеткен ауылдар бір жаңғырып, мыңға тарта үй салынды. Енді мұндай апат тағы қайталанбау үшін дайындықты күшейту керек, дейді мамандар.
ЖАНДОС ДҮЙСЕНҒАЛИЕВ, ОРАЛ ҚАЛАСЫ ӘКІМІНІҢ ОРЫНБАСАРЫ:
Совет үкіметі кезінен бар бөгеттер бар. Соларды қайтадан үстінен нығыздап, тағы да 1-2 метрге биіктету жұмыстары жүріп жатыр. Қаламыз бойынша 400-ден астам арнайы техникамыз дайын. Жалпы 10 эвакпункт бекітілген болатын. Бұл эвакпунктте 2500 адам орналастыруға мүмкіншілігіміз бар. Одан бөлек, тағы да 10 эвакпункт резервке қойып отырмыз. Сонда 20 эвакпункт болады. Барлығына 5 мың адам сияды.
Өңірдегі гидротехникалық нысандардың тозығы жеткен, енді бірінің иесі жоқ. Ендігі міндет - осыларды жөндеп, құжатын түгендеу.
НҰРАЛЫ МУСИЕВ, БҚО ТЖД БАСҚАРМА БАСТЫҒЫ:
Су тасқыны кезеңіне орай тәулік бойы департамент базасында жедел штаб жұмысын атқарып жатыр. ТЖД-ның жеке құрамы және аумақтық бағыныстағы жеке құрам толық жоғары дайындық режиміне көшірілді.
Өңірде су басу қаупі бар 68 ауыл бар екен. Бұл аздай, Жайық келер жылы тағы да тасуы мүмкін. Қазірдің өзінде өзен деңгейі былтырғыдан 40 сантиметрге жоғары. Ал мамандар тасқынға тас-түйін дайынбыз дейді.
