Биыл бала құқықтарын қорғау саласында 3 негізгі заң қабылданды. Олар балалардың жағдайын жақсартуға, әлеуметтік қолдау көрсету мен қауіпсіздігін күшейтуге бағытталған. Алғашқысы -ақпан айындағы жетім балалар үшін тәлімгерлік институтын енгізу бойынша өзгерістер. Бүгінде жоба аясында 17 қалада 330-дан астам тәлімгер айқындалып, олар жасөспірімдердің қоғамға бейімделуіне және өз бетінше өмір сүруге дағдылануына көмек көрсетіп жатыр.
МАДИНА БИСЕМБАЕВА, ҚР ОҚУ-АҒАРТУ МИНИСТРЛІГІ БАЛАЛАРДЫҢ ҚҰҚЫҚТАРЫН ҚОРҒАУ КОМИТЕТІНІҢ БАСПАСӨЗ ХАТШЫСЫ:
Желтоқсан айында Сенат мұндай балаларға арналған отбасылық құрылымның жаңа формасын – кәсіби қабылдаушы отбасын енгізетін заңды мақұлдады, бұл олардың тұрақты ортадағы өмір сүру және тәрбиелеу жағдайларын жақсартады. Сондай-ақ заңмен қамқоршылық органдары мамандарының штат саны – 5 мың балаға кемінде бір маман болып белгіленген, осылайша олардың жұмысының тиімділігін арттыру көзделіп отыр.
Сондай-ақ сәуірде әйелдер құқықтары мен балалар қауіпсіздігін қамтамасыз ету бағытында заңға қол қойылып, ол маусым айынан бастап күшіне енді. Бұл заң 70-тен астам өзгерісті қамтып, балаларға қатысты жасалған зорлық-зомбылық үшін жауапкершілікті күшейтуді және олардың қауіпсіздігін қамтамасыз етуді көздейді.
ДИНАРА ЗӘКИЕВА, ҚР БАЛА ҚҰҚЫҚТАРЫН ҚОРҒАУ ЖӨНІНДЕГІ УӘКІЛІ:
Осы заңда түзетулердің 60%-ы, яғни 49 түзету балаларға арналған. Өздеріңіз білетіндей Президент бастамасымен Қазақстанда балаларға арналған біраз реформалар жүзеге асырылуда. Заңдар қабылданды. Мысалы “Ұлттық қор” бағдарламасы жүзеге асырылуда. Сонымен қатар “Жайлы мектептер” жобасы жүзеге асырылуда, “Қазақстан халқына” қорының 67 әлеуметтік маңызы бар жобалар жүзеге асырылуда.
