Түркістан облысы Арыс қаласында Қазақстанның көлік және логистика саласындағы жаңа әрі ауқымды нысан іске қосылды. Бұл жоба Мемлекет басшысы Қасым-Жомарт Тоқаевтың экономиканы әртараптандыру, көлік-логистика саласын дамыту тапсырмасы бойынша жүзеге асып отыр. Халықаралық транспорттық-логистикалық жаңа орталық ТМД елдерімен ғана емес, сонымен қатар алыс-жақын Азия мен Еуропа елдерімен сауда байланыстарын күшейтуге бағытталған. Бұл азық-түлік бағасының тұрақтылығын қамтамасыз етуге және көлік шығындарын қысқартуға ықпал етеді.
ӘЛІШЕР РҮСТЕМБЕК, «MEGA-AGAT» КОМПАНИЯСЫНЫҢ ДИРЕКТОРЫ:
Өзіміздің логистикалық орталықта екі теміржол линиясы бар. Орташа есеппен алған кезде 45 вагон сиымдылығы бар . Арыс тоғыз жолдың торабы, транзиттік әлеуметтік потенциалын одан әрі дамытуға бізге кең мүмкіншіліктер беріп отыр.
6 гектар аумақты қамтитын кешеннің қоймалары 17 000 шаршы метр. Оның 14 000 шаршы метрі қатты заттарды сақтауға арналған болса, 3 мың шаршы метрі көкөністер мен басқа да тез бұзылатын өнімдерге арналған арнайы желдеткіш жүйесімен жабдықталған.
