Жұрт демалысқа шығып, мәз-мейрам болып мерекені тойлап жатқанда олардың жұмысы қызады. Төтенше қызмет саласының өкілдері жаңа жыл түні кезекшілікте болады. Полицейлер де сондай. 31 желтоқсанда ел тыныштығын күзеткен тәртіп сақшыларының басынан қызықты да оқыс оқиғалар өтеді.
«Жыл сайын кезекшілікте болатындықтан, жаңа жылды отбасымен қашан қарсы алғаным есімде жоқ». Тіс қаққан тәртіп сақшылары осылай дейді. Алайда, ол үшін өкінген емес. Себебі, ел тыныштығын күзету, оқыс оқиғалардың алдын алу -оның кәсіби міндеті. Досжан Қазиев өткен жаңа жыл түні болған ерекше оқиға туралы айтып берді.
ДОСЖАН ҚАЗИЕВ, ҚАЛАЛЫҚ ПОЛИЦИЯ ДЕПАРТАМЕНТІ ПАТРУЛЬДІК ПОЛИЦИЯ ПОЛКІНІҢ АҒА КЕЗЕКШІ ИНСПЕКТОРЫ:
Бір жүргізуші көлігінен шығып, дүкенге кіріп, көлігін оталдырып қалдырып кеткен. Дәл сол кезде жаңа жылды тойлап жүрген бір жаяу жүргінші сол көліктің жанынан өтіп бара жатып, көлікке отырып: «Үйіме жетіп алайын», - деп отырып кеткен. Жол-жөнекей келе жатып, жол-көлік оқиғасына түсіп қалды. Сол жерде бірнеше көлікті соғып, жүргізушілермен төбелес шығарып, ешкімге бағынбаған. Біз лезде келіп, ол жүргізушіні ұстадық.
Ал, Айдос Нышанов жаңа жыл түні түрлі келеңсіз жағдайлар болады дейді. Көпшілік орындарда ата-анасы баласынан көз жазып қалады, немесе отшашудан зардап шеккендер болады, ішімдік ішкендер де жиі кездеседі.
АЙДОС НЫШАНОВ, ҚАЛАЛЫҚ ПОЛИЦИЯ ДЕПАРТАМЕНТІ ПАТРУЛЬДІК ПОЛИЦИЯ ПОЛКІНІҢ ИНСПЕКТОРЫ:
Мысалы, өзінің 3-4 жасар қызын немесе ұлын жоғалтып алатын кездер болған. Біз дереу ата-анасынан сұрап, жасы нешеде екенін, не киім кигенін сұрап, соны жедел басқару орталығына баяндап, рация арқылы хабар береміз.
Жаңа жыл түні тәртіп сақшылары күшейтілген режимде жұмыс істейді. Сондықтан, полиция қауіпсіздік ережелерін қатаң сақтау керектігін тағы бір ескертті.
ДӘУЛЕТ ӘБІШЕВ, АСТАНА ҚАЛАСЫ ПД ПАТРУЛЬДІК ПОЛИЦИЯ ПОЛКІНІҢ ШТАБ БАСТЫҒЫ:
Мереке қарсаңында департамент жеке құрамы күшейтілген режимде жұмыс істейді. Қаланың барлық жерлері, әсіресе, қоғамдық орындарда қауіпсіздікті қамтамасыз етеді.
Былтыр жаңа жылдық мейрамдағы демалыс күндері Ішкі Істер Министрлігінің мәліметінше, 715 қылмыс тіркелген. Тәртіп сақшылары соның 485-нің ізін суытпай ашқан.
