Тәртіп сақшылары боранды күні таулы аймақтағы жолдарда қалып қойған 60-қа жуық жүргізушіге көмек көрсетті.
Күн райының күрт суытуы мен жолдардың тайғақ болуына байланысты және мерекелік күндерге орай түркістандық полицейлер күшейтілген режимде қызмет атқаруда.
Сондай-ақ, тәулік бойы кезекшілікке түсіп, көк тайғақтан жол шетіне шығып кеткен көліктерге көмек беріп жатыр.
Мәселен, Созақ ауданындағы Екпінді-Бірлік тас жолында жол жиегіне шығып кеткен «DAF» маркалы ауыр жүк көлігін қауіпсіз жерге алып шықты. Сонымен қатар, 23 жеңіл көлік пен 37 жүк көлігін қар құрсауынан шығарды.
Кейбірінде сақшылар ұзақ жолдан келе жатқан ауыр жүк көліктерінің жүргізушілеріне ыстық шәй мен тағам жеткізіп берді.
Игі іске куә болған азаматтар полиция қызметкерлеріне шынайы алғыстарын жеткізді.
— Полиция қызметкерлерінің жылдам әрекеті мен кәсібилігінің арқасында қиын жағдайдан аман шықтық. Күн-түн демей қызмет етіп жүрген тәртіп сақшыларына алғысымызды айтамыз, — деді көлік жүргізушілері.
Бұл туралы kaz.inform.kz хабарлайды.
