7 қаңтарда елдің сегіз қаласында ауа сапасының нашарлауына байланысты қолайсыз метеорологиялық жағдайлар күтіледі. Бұл туралы «Қазгидромет» РМК мәлімдеді, деп хабарлайды Azattyq Rýhy.
«7 қаңтарда Павлодар, Өскемен, Семей, Риддер, Атырау, Ақтөбе, Алматы және түнде Астана қалаларында ауа сапасының нашарлауы күтіледі», – делінген синоптиктер хабарламасында.
Қолайсыз метеорологиялық жағдайлар дегеніміз – қысқа мерзімді метеорологиялық факторлардың (тыныш ауа райы, әлсіз жел, тұман, инверсия) үйлесімі. Бұл факторлар зиянды заттардың атмосфераның төменгі қабатында жиналуына ықпал етеді.
Синоптиктер тұрғындарға ауа сапасына байланысты жағдайды қадағалап, қажетті сақтық шараларын сақтауға кеңес береді. Әсіресе, жүрек-қан тамырлары мен тыныс алу аурулары бар адамдарға ұзақ уақыт далада жүруден аулақ болу ұсынылады.
