Қызылордада патрульдік полицияның қызметтік көлігі апатқа ұшырап, 2 полицей зардап шекті. Жол көлік оқиғасы Самара-Шымкент тас жолының Талдыарал елдімекені тұсында болған. Олар сол маңға шақырту бойынша барған көрінеді. Өз қызметтерін атқарып, көліктеріне отырған уақытта «Маn» жүк көлігінің жүргізушісі басқару жүйесіне ие бол алмай «Газель эвакуаторына» соққан. Ал тіркемесі полицейлердің қызметтік автокөлігінің үстіне құлаған және «Лексус» маркалы автокөлігіне соққан. Салдарынан 4 адам жарақат алып, ауруханаға жеткізілді. Қазіргі уақытта сотқа дейінгі тергеп-тексеру әрекеттері жүргізілуде.
