Қызылорда облысында боранды күні жоғалған бақташы табылды, - деп хабарлайды Massaget.kz.
7 қаңтарда түнгі уақытта Жалағаш ауданы полиция бөліміне 64 жастағы бақташы жоғалғаны туралы хабар түскен. Таңғы уақытта мал бағуға шыққан бақташы қайта оралмаған.
Ер адам Жалағаш ауданы Жаңадария ауылынан батысқа қарай шамамен 20 шақырым жерде Құмжарған деп аталатын жер учаскесінде орналасқан мекемеге тиесілі мал шаруашылық фазендасында мал баққан. Жайылымнан уақытында оралмаған бақташыны қожалықтың басқа қызметкерлері өз күшімен іздеген. Алайда нәтиже болмағандықтан, полицияға жүгінуге тура келген.
Бұл дерек Жалағаш аудандық полиция бөліміне тіркеліп, адам жоғалу дерегі бойынша қажет іс-шаралар жүргізілген.
Полицейлер, төтенше жағдай департаментінің қызметкерлері, ауыл тұрғындары мен еріктілерден арнайы топ құрылып, жоғалған бақташыны іздестіру жұмыстары жүргізілді. Ауданның барлық ауылы, жолдар түгел қамтылды.
"Іздестіру жұмыстары сәтті аяқталды. Жоғалған бақташы түнгі 02:00 шамасында аман-есен табылды. Қожалық иесі полиция бөлімі мен аудандық полиция бөлімінің қызметкерлеріне алғыс білдірді", - деп жазылған хабарламада.
