Атырауда браконьерлер Жайық өзенінің Каспий теңізінен құяр сағасынан заңсыз балық аулаған. Рейд кезінде олар мотоциклін тастап қашып кеткен, - деп жазды KAZINFORM.
Жайық-Каспий облысаралық бассейндік балық шаруашылығы инспекциясының өкілі Олег Тушкановтың айтуынша, инспекторлар 10 қаңтарда Жайық өзенінің Каспий теңізіне шығар тұсында «Урал» мотоциклі тоқтатпақ болған. Алайда мотоциклді жүргізушісі қамысқа қарай бұрған.
– Бұл – заңсыз балық аулаушылардың көлігі. Ондағы адамдар қамыс арасына кірген соң мотоциклді тастап, қашып кетті. Тексеру кезінде мотоциклден жалпы салмағы 17 келі әр түрлі балық табылды. Заңсыз ауланған балық «Тілекші» ЖШС-ға сақтауға тапсырылды, - деп хабарлады Олег Тушканов.
Фото: Жайық-Каспий облысаралық бассейндік балық шаруашылығы инспекциясы
Оның дерегіне қарағанда, аталған дерекке қатысты ҚР Әкімшілік құқық бұзушылық туралы кодексінің 383-бабының 3-бөлігімен әкімшілік хаттама толтырылған. Ал иесіз қалған мотоцикл автотұраққа қойылған.
– Мотоцикл иесі мен онымен болған құқық бұзушыларды табу үшін құқық қорғау органдарына хабар берілді. Заңсыз балық аулаушылар әкімшілік жауапкершілікке тартылады, - деп мәлім етті Олег Тушканов.
