Оралда бүлдіршіндерді балабақшаларға орналастыру тәртібі жеңілдеді. Енді ата-аналар баласын орын босап, бұйырған мекемеге емес, көңілі қалағанына аманаттай алады. Әзірге бұл жоба үш облыста ғана жүзеге асырылып жатыр. Егер бастама өзін ақтаса, күллі ел көлемінде кеңінен қолданылмақ.
Оралда 19 мың бүлдіршін балабақшаға барады. Тағы 3 мыңнан астамы кезегін күтуде. Дегенмен өңірде ваучерлік қаржыландыру енгізілгелі бері балабақшаға бала беру тәртібі жеңілдеді. Енді тұрғындар баласын орын босаған мекемеге емес, қалағанына бере алады. Әзірге Тараз, Шымкент және Оралда енгізілген бастама ойдан шықса, басқа облыстар да үлгі алмақ.
АЙНҰР НЕГМЕТОВА, ҚАЛАЛЫҚ БІЛІМ БЕРУ БӨЛІМІНІҢ ӘДІСКЕРІ:
Ваучерлік қаржыландыруға ауысқанға шейін балабақшаға тіркелгенде ол балабақшаны көрсетпейтін еді. Енді қазіргі таңда әрбір ата-ана баласын қай мекенжайдағы болса да, балабақшаға барғысы келсе, таңдап өз жеке кабинетінде көрсете алады. Бұрын ондай мүмкіндік болған жоқ.
Ал 22 мың адам баспанаға мұқтаж. Тұрмыс тауқыметін тартқан әлеуметтік осал топтың өкілдері арасынан былтыр 200-і отбасы үйлі болды.
ОЛЬГА ПЯСЕЦКАЯ, ҚАЛА ТҰРҒЫНЫ:
Аумағы 30 шаршы метрге де толмайтын қуықтай үйде екі бала өсірдік. Қазіргі пәтерім екі бөлмелі, кең, жарық, жанға жайлы, керектінің бәрі бар. Осындай мүмкіндік берген жергілікті билікке алғыс қана айтамыз.
Енді қала әкімдігі бұл көрсеткішті еселеп көбейтеміз дейді. Бюджетті бекітушілер батасын берсе, биыл мыңға тарта адам баспаналы болмақ.
АБЗАЛ ЖҰМАЛИЕВ, ҚАЛАЛЫҚ ҚҰРЫЛЫС БӨЛІМІНІҢ БАСШЫСЫ:
Кезекті азайту мақсатында бес қабатты бес тұрғын үйдің құрылысы аяқталып, конкурстық рәсімдер өтіп жатыр қазіргі таңда. Ағымдағы жылы мысалы мыңға жуық үй сатып алатын болсақ, жылдағы кезекті жабамыз, одан алдыңғы жылдары 180-200 пәтерден беріп отырдық. Биыл бұйырса, жоспарда мыңға жуық пәтер беру жоспарда.
Мемлекет қазынасының тең жарымы елдегі әлеуметтік мәселелерді шешуге жұмсалады. Әлеуметтік осал топтағыларға бөлінген ақша биыл 6 триллион теңгеден асқан. Яғни, бұл көмектің шарапаты еліміздің әрбір төртінші азаматына бұйырады.
