Бірнеше күннен бері ауа-райы құбылып, халықтың мазасы қашты. Бораннан жолдар жабылып, төтеншеліктер қайта-қайта ескерту жасап жатыр. Мұндай қолайсыздық бізде ғана емес. АҚШ-тың оңтүстігінде де қыс қаһарына мінді. Қалың қар жауып, жел дес берер емес. Аяздан 9 адам көз жұмған. Жер-жаһандағы табиғи апаттар мен соңғы жаңалықтарды әріптесім Аружан Задабек айтады.
Расымен, қытымыр қыс келіп жұрт біраз әбіржіп қалды. АҚШ-та адамдар далаға шыға алмай отыр. Кей жерлерде қардың қалыңдығы 25 сантиметрге жеткен. Мұндай жағдай қалада соңғы рет 16 жыл бұрын болған. Қазір 30 мың үй жарықсыз қалып, әуе рейстері кейінге шегерілді.
Словениядағы шахтада апат болды. Онда қайтыс болған жұмысшылардың саны үшке жеткен. Қазір билік жағдайдың қалай ушыққанын анықтап жатыр. Тергеу басталып кетті. Қайғылы жағдайға байланысты 24 қаңтар, яғни ертең елде аза тұту күні болып жарияланды.
«PREMOGOVNIK» КОМПАНИЯСЫНЫҢ БАС ДИРЕКТОРЫ:
Шахтада жұмыс істейтін адам біздің тек әріптесіміз емес, жақын жолдасымыз. Біз ағайынды секілді араласамыз. Дәл қазір біз үшін өте қиын. Өйткені біз жақындарымыздан айырылдық.
Түркиядағы өртке байланысты соңғы ақпараттармен де бөлісейін. Қонақүйден шыққан жалыннан көз жұмғандар саны қазір 80-ге таяды. 11 күдікті қамауға алынды. Өрттің себебі анықталып жатыр. Ішкі істер министрі қонақүйде сараптамалық жұмыс аяқталғанын айтты. 1978 жылы салынған 12 қабатты қонақүйді бұзу туралы шешім қабылданды.
АЛИ ЕРЛИКАЯ, ТҮРКИЯНЫҢ ІШКІ ІСТЕР МИНИСТРІ:
Қайғымызды сөзбен жеткізу мүмкін емес. Қайтыс болғандар саны өсіп жатыр. Біраз мәйіттің жеке басы анықталды.
Өрт жан-жақты жалмап жатыр. Лос-Анджелес қаласының маңындағы тілсіз жау қайта өршіді. Лаулап жанған от 39 шаршы шақырым аумақты жалмап үлгерген. Жалынмен күреске мыңнан астам өрт сөндіруші жұмылдырылған. 50 мың тұрғынға қауіпсіз жаққа шұғыл көшу туралы нұсқау берілді.
