Атырау облысында Сармат дәуіріне жататын алтын әшекейлер табылды. Қызылқоға ауданы Қарабау ауылы маңындағы обаларға екі жыл археологиялық қазба жұмыстары жүргізілген. Диаметрі – 70, биіктігі – 3 метрлік патшалық қорғанның 9 қабірі зерттеліп, оның жетеуінің тоналмағаны анықталды. Мамандар көшпелілер дәуіріндегі «сармат көсемдері жерленген» бірегей ескерткіш деп отыр. Екі мың жарым бұрынғы ата-бабаларымыз қолданған бұйымдар, қару-жарақпен бірге асыл тастар мен алтын-күмістен соғылған аң стиліндегі әшекей бұйымдар өте жақсы сақталған.
МАРАТ ҚАСЕН, АТЫРАУ ОБЛЫСТЫҚ ТАРИХИ-ӨЛКЕТАНУ МУЗЕЙІНІҢ АРХЕОЛОГЫ:
Қазіргі кезде 3 обаны қаздық. Бұл біздің Каспий аймағы, соның ішінде Сағыз, Жайық өзенінің маңында кезінде үлкен империяның орталығы деп айтуға болады. Өйткені шығып жатқан жәдігерлер, одан басқа ғибадатхананың , сарматтардың басқа да заттары біздің ғылымда жаңаша көзқарас тудырады. Мыңға жуық көптеген жәдігер шықты. Соның ішінде 100-ге жуық алтыннан жасалған.
