Әлеуметтік желіде “Бірге кітап оқиық” аманаты басталды. Мақсат отандық және шетелдік шығармаларды елге насихаттау. Оны танымал блогер-журналист Санат Ілияс пен Жаңабике Қабылда жүргізеді. Олар осы үрдіске дүйім жұртты ат салысуға шақырып жүр.
Игі бастаманың шымылдығы Әзілхан Нұршайықовтың жұрт жақсы білетін “Махаббат қызық мол жылдарымен” түрілді. Алғашқы қатысушы Президент кеңесшісі - Президенттің баспасөз хатшысы Берік Уәли.
Берік Уәли жастарға сәттілік тілеп, өзінен кейінгі “Бірге кітап оқиық” аманатын Мәдениет және ақпарат министрі Аида Балаеваға жолдады.
БЕРІК УӘЛИ, ҚР ПРЕЗИДЕНТІНІҢ КЕҢЕСШІСІ - ҚР ПРЕЗИДЕНТІНІҢ БАСПАСӨЗ ХАТШЫСЫ:
Артық білім кітапта, ерінбей оқып білуге деп Абай атамыз айтқандай, кітап оқуға үндеу бұл енді Мемлекет басшысының айтып жүрген бастамасын қолдауға арналған арнайы жоба болғандықтан мен де бұл бастамаларыңды құптаймын, қолдаймын. Барлық еліміздің азаматтарын, тұрғындарын кітап оқуға шақырамын.
Сонымен қатар келесі оқылатын кітап ретінде Бауыржан Момышұлының “Ұшқан ұясын” таңдады. Оған қоса оқырмандарға сыйлау үшін кітаптың 10 данасын тарту етті. Игі іске әлеуметтік желіде қолдау білдіріп жатқандар қатары көп.
ПІКІР:
- Оқитын ұлт болу үшін осындай жобалар көбейе бергені дұрыс. Іске сәт!
- Бүгінгі таңда кітап оқу трендте. Кітап оқып, санамызды ашып, нейрондарымызды жаңарта берейік. Бастамаға қолдау білдіріп, сәттілік тілеймін!
- Әдемі бастама екен! Іске сәт! Саналы, білімді ұрпақ көбейсін!
Кітап пен кітапхана ісін алға сүйрейтін осындай әрекеттің көп болуы керек екенін Мемлекет басшысы да жиі айтады.
ҚАСЫМ-ЖОМАРТ ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Біз, ең алдымен, жастарды кітап оқуға баулуымыз керек. Сонда жаппай кітап оқитын ұлтқа айналамыз.
Кітаппен дос болған адам дүниенің ғажабын танып біле алады. Сондықтан білімнің көкжиегін тек кітаптан табатынымызды ұмытпайық дейді ұйымдастырушылар.
