Еліміздің кейбір облысындағы білім саласына жауапты мамандар ескі мектептерді жөндеуге құлықсыз. Бұл туралы Оқу-ағарту министрі Ғани Бейсембаев кеңейтілген алқа отырысында айтты. Мемлекет басшысының тапсырмасына сәйкес, биылдан бастап 1300 мектепті жаңарту басталған. Олардың қатарында 40-70 жылдан бері жөндеу көрмеген ескі білім ошақтары бар. Мәселен осы уақытқа дейін Алматы, Павлодар және Солтүстік Қазақстан облысындағы кейбір білім беру ұйымдарының инфрақұрылымы толыққанды модернизацияланбаған. Білім басқармасының басшылары жылдар бойы жөндеу көрмеген мектептерге кітап және жиһаз сатып алумен шектелген.
ҒАНИ БЕЙСЕМБАЕВ, ҚР ОҚУ-АҒАРТУ МИНИСТРІ:
Білім басқармаларының басшылары білім беру объектілерін салуға, модернизациялауға және жекеменшік мектептер ашуға деген қажеттілікті анықтау мәселесін егжей-тегжейлі пысықтау қажет. Бүгінгі күні мұндай да мәселе туындап отыр. Бұл мәселе біздің министрліктің ерекше бақылауында болады.
Жиында мұнан бөлек, білім беру мазмұнының сапасы, менеджмент, балалардың қауіпсіздігі және кадр даярлау мәселесі де қозғалды. Қазір мектеп директорларының 9 пайызында ғана «менеджер-жетекші» біліктілік санаты бар. Осы мәселені шешу үшін 2023 жылдан бері «Білім берудегі өзгерістің 1000 көшбасшысы» жобасы іске асырылуда. Бағдарлама іске қосылғанына қарамастан әлі де 740 мектепке директор жетіспейді. Оның 81 пайызы ауыл мектебіне тиесілі.
АЙМАН ДҮЙСЕНБАЕВА, ҚР ОҚУ-АҒАРТУ МИНИСТРЛІГІ ОРТА БІЛІМ БЕРУ КОМИТЕТІНІҢ БАСҚАРМА БАСШЫСЫ:
Олар кадрлық резервте 2 жыл тұрады. Екі жылдың ішінде тағайындалады. Бірақ оларды білім сапасын көтеру үшін тез арада ашылған мектептерге не болмаса зейнетке кететін директорлар бар олардың саны да әжептеуір. Міне солардың орнына тағайындайды деп ойлаймыз.
