Қостанай облысында қарттарды алдап, қаражатын алып кеткен алаяқ сотталды. Ол Рудный мен Жітіқарада бірнеше зейнеткердің ақшасын қалтаға басқан. Күдікті қарт кісілердің сеніміне кіру үшін туыспын, таныспын деп арбаған. Олардың үйіне барып, жанашырлық танытқан болады. Азық-түлік әкеліп берем деген сылтаумен қомақты ақша алады. 650 мың теңгені қалтаға басқан алаяқ қарасын көрсетпей кетеді. Әлгі әккі әйел бұған дейін де бірнеше рет істі болған көрінеді. Сотталушы кінәсін толық мойындап, жасаған ісіне өкініп, бас бостандығынан айырмауды өтініпті. Алайда бұған дейін де алаяқтық жасаған әйелге ауыр жаза тағайындалды.
ЛӘЗЗАТ БАЙҒОЖИНА, ОБЛЫСТЫҚ СОТ БАСПАСӨЗ ҚЫЗМЕТІ БӨЛІМІНІҢ БАСШЫСЫ:
Жасаған әрекетінің қоғамдық қауіптілік дәрежесін, іс бойынша барлық мән-жайларды ескере отырып, оның әрекетінде қауіпті рецидив таныла отырып, қауіптілігі жоғары дәрежедегі мекемеде жазасын өтеуге 4 жыл бас бостандығынан айыру түрінде жаза тағайындады.
