Балабақша иелері жаппай кредит алуға көшті. Кәсіпкерлер санитарлық-эпидемиологиялық бақылау комитетінің айыппұлдарынан көз ашар емес. Оны төлеу үшін былыққа баттық деп наразы. Бизнес өкілдерінің жанайқайын депутаттар жеткізді. Бізде 986 мыңнан астам бала бақшаға барады. Оның жартысынан астамы жекеменшік мекемеде тәрбиеленеді.Тағы 84 мың бүлдіршін кезекте тұр. Бұл елдегі балдырғандардың 8,5 пайызы үйде отыр деген сөз. Оған себеп - тәрбие орындарының жетіспеушілігі. Қайрат Балабиев СЭС сес көрсетуін тоқтатпаса, балабақша саны, тіпті, азаюы мүмкін екенін ескертті.
ҚАЙРАТ БАЛАБИЕВ, ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Өткен жылы мектепке дейінгі ұйымда 7 497 тексеру жүргізілген, тексеріс қорытындысы бойынша 6 802 (90,7 %) объектіде санитарлық-эпидемиологиялық талаптардың 14 776 жүйелі бұзушылық тіркеліп, 4 027 жауапты тұлғаға 1 млрд. 120 млн. теңге көлемінде айыппұл салынған. Әр кәсіпкерге жылына екі рет салынған айыппұл 1 млн. теңгеден асып, қалталары көтермей, айыппұлды несие алу арқылы төлеуге мәжбүр болған.
