"Бірге кітап оқиық". Қоғамды кітап оқуға шақыратын тың бастама жалғасуда. Бүгін "AMANAT" партиясының қолдауымен Еуразия ұлттық университетінің сутденттері "Ұшқан ұя" шығармасын талқылады. Бауыржан Момышұлының әйгілі туындысын акцияның алғашқы күнінде Президенттің кеңесшісі, баспасөз хатшысы Берік Уәли ұсынған еді. 200-ге жуық студент романның маңызы мен оқиғалары жайында пікір алмасты.
ЭЛЬДАРА ОБАЙДУЛИНА,СТУДЕНТ:
Оның кітабының ішіндегі құндылықтары, берері және алары да көп деп білемін. Себебі ондағы оның отбасы мен өмірі, ауылдағы хикаялары, оның өмірінен, басынан өткерген әрбір сәттерінің өзі бір, белгілі бір танымдық тәрбиеге толы деп білемін. Сондықтан "Ұшқан ұя" ол керемет таңдау.
Игі бастама кітапты қолдан қолға өткізіп, қоғамның рухани баюына ықпал етуді көздейді. Сондай-ақ Мемлекет басшысының "кітап оқитын ұлтқа айналу" тұжырымдамасына сай келеді. Бұл - миллиондаған кітап қорынан айырылып, оқудан алшақ қалған сәтте, мәселенің алдын алатын бірегей жол дейді ұйымдастырушылар.
БАУЫРЖАН БАБАЖАНҰЛЫ, ҚАЗАҚСТАН ЖАЗУШЫЛАР ОДАҒЫ ҚАЛАЛЫҚ ФИЛИАЛЫНЫҢ ДИРЕКТОРЫ:
Қазір біз кітап оқудан алшақтап бара жатырмыз өкінішке қарай. Сол жұрттың бәрін кітап оқуға, әсіресе жас ұрпақты кітап оқуға жақындату үшін осындай жоба қолға алынып жатыр. "AMANAT" партиясының бұл жобасы көпшілік арасында, елдің арасында, жұрттың арасында, мынау студенттердің арасында үлкен бір дүмпу туғызады ғой деп ойлаймыз.
