Астанада доп теуіп жүрген 25 жастағы тұрғынның үстіне футбол қақпасы құлады. Жас жігіт тіл тартпай кетті. Қайғылы жағдай «Достық арена» спорт алаңында болды. Футбол ойыны кезінде қақпада тұрған жігіт оған асылып, айналмақшы болады. Алайда қақпа үстіне құлаған. Медициналық көмек көрсетілгенімен, ойыншыны аман алып қалу мүмкін болмады. Спорт алаңының өкілдері жауап беруден бас тартты. Ал оқыс оқиға болған кезде сол жерде болған куәгер телефон арқылы тілдесті.
АЯН ОМАРОВ, КУӘГЕР:
Мен бұл алаңға көршілес орналасқан футбол манежінде әкімші болып қызмет етемін. Кеше полиция алдымен бізге келді. Мен оларды оқиға болға жерге ертіп апардым. Ол кезде жас жігіт қайтыс болып кетіпті. Балалар асыр салып ойнағандықтан, қақпаны шынжырмен жерге бекітіп қою керек. Сол кезде мұндай оқиғалар болмайтын еді.
Полиция бұл жағдайға қатысты қылмыстық іс қозғады. Тергеу басталған.
ЭЛЬМИРА ШАУЛЕНОВА, ҚАЛАЛЫҚ ПД АҚПАРАТТЫҚ САЯСАТ БӨЛІМІНІҢ БАСТЫҒЫ:
Футбол алаңыда ер адамның қайтыс болуына байланысты сотқа дейінгі тергеу басталды. Алдын ала мәлімет бойынша қайғылы оқиға ойын барысында орын алған. Ол қақпаның жанында тұрып, қолымен маңдайшадан ұстап асылған кезде қақпа аударылып кетіп, оны басып қалған. Оқиғаның барлық мән-жайын анықтау үшін тергеу шаралары жүруде.
