Атырауда тұрғындар тозығы жеткен үйді терможаңғыртудан өткізе алмай жүр. Бұқара әбден ескірген үйді жөндеуге өз қауқарымыз жетпейді,- дейді. Ал жауапты мекеме басшыларына қанша шағымданғанмен, құлақ аспай отыр деп өкпелі. Айтуыларынша, ылғал тартқан баспананың кесірінен балаларында тері ауруы пайда болған.
Пайдалануға берілгеніне жарты ғасырдан асқан бұл Мұхтар Әуезов көшесіндегі 52А үй жертөлесі суға толып тұр. Қолқаны қабатын жағымсыз иіс алыстан сезіледі. Қабырғалары көктеп, қысы-жазы маса мазаны алады,- дейді әбден ашынған жұрт. 120 пәтерлік үй тұрғындары қайта жаңғыртудан өткізу үшін жауаптыларыдң есігін тоздырған. Әзірге құлақ асқан ешкім жоқ.
НАТАЛЬЯ АЛЕКСАШЕЧКИНА, ҚАЛА ТҰРҒЫНЫ:
Мен осы үйде 40 жылдан бері тұрамын. Толық жөндеу жүргізілгенін көрмедім. Өзіміз модернизация үшін қол жинадық. Бірақ, мәселеміз шешілмеді. Енді қайда барарымызды білмейміз. Үйдің құжаттары жоғалып кеткен. Канализация ағып жатыр, үйден сасық иіс шығады, подъезге шығу мүмкін емес. Қыста да масалармен алысамыз. Пәтер иелері кооперативі бізден ақша жинаудан басқа түк жұмыс істемейді.
ЕЛЕНА КУРОЧКИНА , ҚАЛА ТҰРҒЫНЫ:
Шатырды түгел ауыстыру керек, су ағып жатыр. Жертөледе не болып жатқанын айтудың өзі қорқынышты, оны тазарту қажет. Жалпы, кәріз жүйесі мен шатырды толық ауыстыруды талап етеміз.
Тұрғындар үйді жаңғырту бағдарламасына енгізу үшін арыз жазған. Алайда, тиісті құжаттың болмауынан іс аяқсыз қалыпты. Өздерінің айтуынша, «Айдын» пәтер иелері кооперативі құжаттарды жоғалтқан. Ал қалалық тұрғын үй-коммуналдық шаруашылық және тұрғын үй инспекциясы бөлімі бұл жағдайдан бейхабар болып шықты.
ТЕМІРЛАН ӘУБӘКІРОВ, ҚАЛАЛЫҚ ТҮКШ ЖӘНЕ ТҰРҒЫН ҮЙ ИНСПЕКЦИЯСЫ БӨЛІМІ БАСШЫСЫНЫҢ ОРЫНБАСАРЫ:
Пәтер иелері кооперативінің төрайымын шақыртып қандай құжаттар жоқ екенін мүмкіндігіміз бар толық қарауға. Енді техникалық паспорты, мемлекеттік акті дейміз,мемлекеттік жер акт жоқ болса біз өзіміздің тарапымыздан архивке хат жолдап, бұл үй салынған кезде аталған құжаттары толық болады. Біз архивпен көтеру арқылы қарауға толық мүмкіндігіміз бар.
Әкімдік берген ақпаратқа сүйенсек, былтыр Атыраудағы көпқабатты үйлерді жөндеуге «Нұрлы жер-2025» мемлекеттік бағдарламасы аясында 1 миллиард 337 миллион теңге бөлініп, 27 үй жөндеуден өткен. Биыл терможаңғыртудан өтуге 100-ге тарта үй кезекте тұр. Алайда қаржы әлі бөлінбепті. Сондықтан 52-ші А үйі биылғылар тізіміне енуі неғайбыл.
