Соңғы екі жылда халықаралық және республикалық маңызы бар автожолдарда 3668 жол-көлік оқиғасы тіркелген. Соның салдарынан 1121 адам ажал құшты. 4400-ден астам адам жарақат алған. Қайғылы оқиға жол сапасының нашар болуына байланысты жиілеген. Жыл сайын асфальтты күтіп ұстауға, жол салуға қазынадан қыруар қаражат бөлінеді. Бірақ жең ұшынан жалғасқан жемқорлық салдарынан бұл қаржы діттеген жеріне жетпейді. Соңғы 2 жылда "Қазавтожол" Ұлттық компаниясында сыбайлас жемқорлыққа қатысты 6 құқық бұзушылық тіркелді. Былтырдың өзінде салада парақорлық 58 пайызға, ұрлық 28, ал лауазымды өкілеттігін теріс пайдалану 8 процентке жеткен.
ЕРЛАН САИРОВ, ҚР ПАРЛАМЕНТІ МӘЖІЛІСІНІҢ ДЕПУТАТЫ, "AMANAT" ФРАКЦИЯСЫНЫҢ МҮШЕСІ:
Қазіргі таңда Қазақстанның жолдарын ірі несие алып, жол салып жатырмыз. Кезінде бұл мәселені несиесіз-ақ шешуге болатын еді. Түптеп келгенде, оны салық төлеушілердің есебінен, яғни бюджет қаражатынан қайтарамыз. Сондықтан, бюджеттің қаржысы болғандықтан, қаражат қайда, қалай жұмсалып жатқаны қоғамның бақылауында болуы керек. Қазір біраз жұмыс істеліп жатыр. Оны айту керек. Бірақ біздің өңірлерде проблема өте көп.
