22 ақпаннан бастап Қостанай-Троицк бағытындағы жол ақылы болады. Анығырақ айтсақ жүк көлік пен автобус үшін ақша төлеу керек. Бұған көлік тізгіндеушілер наразылық білдіруде. Сапасыз жолға ақы төлеуге қарсы.
ЗАҢҒАР САНАЙ,ТІЛШІ:
Қостанай –Троицк бағытындағы осы жол 4 күннен кейін ақылы болмақ.Алайда көлік тізгіндеушілер мен логистика компания өкілдері наразы.Өйткені тас жолдың сапасы сын көтермейді.
Ақылы болатын жолдың техникалық ахуалы аймақтағы өзге де жолдардан еш айырмашылығы жоқ. Шұрық-тесік, қырық жамалған асфальтпен жүйткудің өзі қауіп. Не үшін ақша төлеуіміз керек дейді, көлік жүргізушілер.
БЛИЦ-САУАЛНАМА:
- Шұрық-тесік. Жол бойы көлігің секіріп отырады. Жол өте нашар.Кейбір тұстары ойылып қалған.
- Бір жылға абономент алу керек. Мүмкін мен он екі айда көп жүрмейтін шығармын. 250 мың теңге. Үш көлігім бар. Сонда 750 мың теңге төлеуім керек. Егер абономент алмасам екі есеге қымбат шығайын деп тұр.
Иә, қауіпсіз жол болса қақысын төлер едік дейді көпшілік. Алайда алпауыт мекеме «ҚазАвтоЖол» ұлттық компаниясының өкілдерінің өз ойы бар.Жолды ақылы ету арқылы сапасын жақсартуға болады, дейді жауаптылар.
АЙДАНА АЙДЫНҚЫЗЫ «ҚАЗАВТОЖОЛ» ҰК» АҚ АҚЫЛЫ АВТОМОБИЛЬ ЖОЛДАРЫ ДИРЕКЦИЯСЫНЫҢ БАСПАСӨЗ ХАТШЫСЫ:
Мұндай шешім жолдардың сақталуына ықпал етеді. Өйткені, ақылы жолдардан жиналған барлық қаражат сол учаскені ұстауға, арнайы жол техникасын сатып алуға, жөндеу жұмыстарын жүргізуге, жол инфрақұрылымын жақсартуға жұмсалады.
Қазақ Авто Жолдың дерегінше, бұл жолда көлік көп жүреді. Техникалық сапасы да талапқай сай.Сондықтан 22 ақпаннан бастап жүк көліктері мен автобустар үшін ақылы болады. Бағасы 1012 теңгеден 6027 теңгеге дейін.Жолға ақша төлеуі үшін, әуелі оны дұрыстап жөндеу керек дейді аймақтағы логистикалық компания өкілдері.
АЛДАН МЕНКЕЕВ, ЛОГИСТИКАЛЫҚ КОМПАНИЯ БАСШЫСЫ:
Не үшін төлейміз?! Жол қырық жамау. Ақысын алғанмен оған кім бақылау жүргізбек. Бір жылдан аспайды. Сарыкөлге барар жолды жөндеді, қазіргі күйі не болды? Ел бойынша осындай жағдай. Барлық жолдар кедір-бұдыр. Тіпті, бетоннан жасалған Көкшетау-Астана тас жолы да ойдым-ойдым.
Сарапшылардың айтуынша жолдың сапасын сақтау үшін ең әуелі көлік жүгін өлшейтін таразыларға көңіл бөлу керек.Өйткені артық жүк тиеген ауыр көліктер асфальттің тас талқанын шығаратын көрінеді.
