Енді МӘМС-ке тіркелмегендер де ақысыз онкологиялық скринингтен өте алады. Елде 3,5 миллион адам медициналық сақтандырумен қамтылмаған. Олар бұған дейін, сәйкесінше, ешқандай тексеруден өте алмады. Жаңа норма қабылданса онкология бойынша скринингтен өту бәріне бірдей қолжетімді болады. Депутаттар мұны екі жыл бойы талқылап, қабылдады.
АСХАТ АЙМАҒАМБЕТОВ, ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Олардың онкология бойынша скринингтен өтуге құқығы жоқ, яғни бұл адамдарды ешкім қабылдамайды, скринингтен өткізбейді. Ал скринингтен өтпегеннен кейін қатерлі ісікті ерте кезеңде анықтау мүмкін емес. Ауруды үшінші, төртінші кезеңде анықтағаннан кейін емдеудің өзі үлкен нәтиже бермейді.
Заңда құлақ мүкістігі бар жандардың құқығы да қорғалған. Бізде бір құлағы жоқ боп туғандар мүгедек деп саналмайды. Тіпті, оларға берілетін тегін көмек те жоқ. Депутат Нартай Сәрсенғалиев бұл мәселені біраздан бері көтеріп келеді. Ақыры нормаға өзгеріс енетін болды. Енді есту қабілеті нашар жандарға мемлекет тарапынан тегін аппарат беріледі.
НАРТАЙ СӘРСЕНҒАЛИЕВ, ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Аппараттар ең кемі, ең нашары 500 мың теңге, жақсылары 5 миллион теңгеге дейін барады. Қанша ма аналармен, әкелермен осы жерде мен жүздестім. Олар кредит алып, алуға мәжбүр. Өйткені балалары естімейді. Екінші жағынан балалар бір-бірін кемсітетін жағдай өте көп. Балалардың, қыздардың мектепке бармай қалған жағдайлары бар.
