Қытайлық компания Жамбыл облысында натрий глутаматын өндіретін зауыт салмақ. Құны - 350 млн АҚШ доллары. Бұл туралы Мемлекет басшысының ел экономикасына инвестициялар тарту жөніндегі тапсырмаларының орындалу барысын қарау жөніндегі кеңесте айтылды. Жалпы ел экономикасының негізгі салаларын қамтитын 20 стратегиялық жоба айқындалған. Үкімет басшысы кеңес барысында мемлекеттік органдар жұмысының тиімділігіне әсер ететін және шара қолдануды талап ететін бірқатар түйткілді мәселені атады. Олардың қатарында инфрақұрылымның тапшылығы, күрделі әкімшілік рәсімдер мен рұқсат берудегі кідірістер, жер телімдерін берудің ұзақ мерзімдері бар.
ОЛЖАС БЕКТЕНОВ, ҚР ПРЕМЬЕР-МИНИСТРІ:
Президент Үкіметтің кеңейтілген отырысында инвестиция тарту басы артық бюрократиядан арылып, жедел ведомствоаралық үйлестіруді талап ететін аса маңызды жұмыс екенін айтты. Мемлекеттік органдар, әсіресе әкімдіктер жобаның іске асырылу барысын тікелей бақылауы керек. Әкімдер мен министрлер инвестиция тартумен күнделікті айналысып, бүгінгі күннің басты міндеті – инвесторлардың мәселелерін жедел шешуі қажет.
