Жетім балаларды асырап алу баяу жүріп жатыр. Осылай деген сенатор Геннадий Шиповских Премьер-министр Олжас Бектеновтің атына депутаттық сауал жолдады. Қазір елде 21 мың жетім және ата-анасының қамқорлығынсыз қалған бала бар. 5 мыңнан астам азамат бала асырап алу кезегінде тұр. Алайда былтыр небәрі 153 жеткіншек жаңа отбасымен қауышқан. Бұл көрсеткіштер бала асырап алу жүйесіндегі әкімшілік кедергілердің барын аңғартады.
ГЕННАДИЙ ШИПОВСКИХ, ҚР ПАРЛАМЕНТІ СЕНАТЫНЫҢ ДЕПУТАТЫ:
Бала асырап алу рәсімін жеңілдету және оны цифрландыру, құжаттарды рәсімдеу мен қажетті тексерістерді онлайн форматта өткізу арқылы үміткерлер үшін процесті оңайлату қажет. Жетім балаларды отбасылық ортада тәрбиелеу саясатын күшейту, қамқоршылық пен патронаттық тәрбие жүйесін жетілдіру, патронаттық тәрбиешілерге төленетін қаржылық қолдауды арттыру маңызды.
