Блогерлерге тықыр таянды. Мемлекеттік кірістер комитеті желі жұлдыздарының соңына түсті. Олар 594 блогер тапқанын жасырды деп айыптап отыр. Салықтан жалтарған желі жұлдыздарының қарызы 53,3 млрд теңгеден асқан. Апта басынан бері қоғамда қызу талқыланып жатқан мәселені әріптесім Аружан Задабек «Өзекті» айдарында толығырақ тарқатады.
Кеш қайырлы болсын, көрермен! Желіде жұрттың зәресін алып, назарын өзіне аудартқан тақырыптар туралы айтамын. Экранға жақын отырыңыз!
Менің қолымдағы не деп ойлайсыз? Иә, бұл қарапайым – топырақ. Басында оған қанша су құйсаң да көріндейді. Қазір де бір қалпын сақтап тұр. Ал, бірден көп мөлшерде құйсаң ше? Топырақ лайға айналады.
Блогерлерге қатысты әңгіме осыған ұқсас. Басында олардың қанша табыс тауып жатқанында ешкімнің шаруасы болмады. Жайлап-жайлап жиі жарнама жасап, ойын ойнататынын байқадық. Осылай назар ауды. Енді, тіпті, бастары бәлеге қалды.
Мемлекеттік кірістер комитеті желідегілердің жегенін желкесінен шығармақ. Қазірдің өзінде 594 блогердің айласын ашты.
Дәл қазір қолым кісендеулі. Көріп тұрсыздар, қимылдауым қиын. Бірнәрсе істейін десем «қолы байлаулының» күйін кешіп тұрмын. Әдетте кінәліге кісен салынады. Мағынасы да сол – енді «білгеніңді істей алмайсың». Бірақ қазіргі түрмелерге сенім бар ма?
Алматы облысында уақытша ұстау изоляторында не болғаны бәрімізге мәлім. Желідегілер шу ете қалды. Әңгіме – түрмеде туған күн тойлағандар жөнінде. Қамаудағылар еш қымсынбастан смартфон қолданып, әндетіп, тіпті ерекше отырысты видеоға түсірген. Олардың кім екенін бірден таныдық. Шерзат Болаттың өліміне қатысты күдіктілер. Қазір ештеңеге таңқалмайтын болдық. Қамауда жатқан шенеунік ет асып, дастархан жайғаны туралы да естігенбіз.
Бұл-сөздік. Бізде білім қуған жастар үшін мұндай том-том кітап көп. Мысалы, Абай Жолы. Оның төрт томы бар. Ал, жана ғана видеодан көрген қайырымдылық қорының құрылтайшысы болған Перизат Қайратқа қатысты қылмыстық іс материалдары 100 томнан асыпты.
Перизат Қайрат тасқын кезінде қайырымдылық қоры арқылы жиналған 1,7 млрд теңгені жымқырды деген күдікке ілінген. Ол ақшаға бірнеше пәтер, жеке үй және автокөлік сатып алған.Анасы Ғайни Алашбаеваға да қылмыстық іс қозғалды.
