Перизат Қайрат мүгедек балаларға оңалту орталығын салу үшін жиналған ақшаны жұмсап жіберген. Biz Birgemiz қорының бұрынғы басшысы Перизат Қайрат тағы бір іс бойынша алаяқтық жасады деген күдікке ілінді. Қаржылық мониторинг агенттігінің ақпаратынша, ол осыдан төрт жыл бұрын Ақмола облысында «Батыр» қоғамдық бірлестігіне оңалту орталығын салу үшін ақша жинау мақсатында қайырымдылық аукционын ұйымдастырған. Жұрттың сенімін арттыру үшін шараға балалардың ата-аналары да тартылған. Нәтижесінде, аукционнан 22 миллион теңге түсіп, оны ол өз қажеттілігіне жұмсаған.
ЕРНАР ТАЙЖАН, ҚР ҚМА РЕСМИ ӨКІЛІ:
Перизат Қайрат орталық қажеттілігі үшін 30 миллион теңгеге жер телімін сатып алғанын мәлімдеген. Алайда тергеу барысында бұл жер телімі "Батыр" қоғамдық бірлестігі тарапынан 2019 жылы сатып алынғаны анықталды. Нәтижесінде оңалту орталығының құрылысы басталмаған. Ал сыйға берілді деп көрсетілген нысан шын мәнінде жоқ болып шықты. Қазіргі уақытта сотқа дейінгі тергеу жалғасуда, басқа ақпараттар тергеу мүддесіне байланысты жария етілмейді.
