Атырауда мүйізді ірі қара арасында қотыр ауруы өршіп тұр. Әсіресе, қала маңындағы Соколок каналын жағалай қоныстанған шаруалар жұқпалы аурумен қыс бойы алысып келеміз,- дейді. Алайда малдың мазасын қашырған дерттен құтыла алмай отыр. Аймақтағы жауаптылар болса, бұл аса қауіпті ауру емес, сондықтан тізімге де алмаймыз деп бей-жай қарауда.
«Абдолла» шаруа қожалығына қарасты 90-ға тарта мүйізді ірі қараның барлығында дерлік қотыр ауруы белгісі бар. Бірінің құйрығы, бірінің мойыны, тіпті кейбірінің терісінің жартысына жуығы түсіп, қанталап тұр. Шаруашылық иесі Нұрбек Есенқұловтың айтуынша, жұқпалы тері ауры желтоқсан айында байқалған. Салдарынан сиыр малының күйі қашып барады.
НҰРБЕК ЕСЕНҚҰЛОВ, ШАРУА ҚОЖАЛЫҒЫНЫҢ БАСШЫСЫ:
Себебі күзде судың каналға дұрыс айдалмауынан, қазіргі кезде каналда су болмауынан деп ойлаймыз. Қазір көріп отырғаныңыздай, каналда су тек табанында қалған. Ол су да шіріп, сасып кеткен. Қазір малымызды сонымен суаруға мәжбүрміз. Осы суды тазалап беру керек, қотырды емдеу жолдарын айту керк. Нақты неден болып тұр, қандай екпе салу керек, халыққа нақты түсіндірме жұмыстарын жүргізу керек.
ҚАЛЫБАЙ МОЛДЫРАХМАНОВ, ШАРУА ҚОЖАЛЫҒЫНЫҢ БАСШЫСЫ:
Мойыннан бастайды, құйрығының үсті, жамбасының үсті. Ветеренар шақырып, Сәрсенбай ектіріп жатыр. Тасқын судан болмаса, басқа неден болады. Жылда мұндай болмайды, судан болады.
Шаруалар мұны су тасқынымен келген кесел,- дейді. Бір мезгілде екпе салдырып, залалсыздандыру жүрмеген соң Соколок жағасындағы қожалықтардың бәріндегі жағдай - осы,- деп отыр. Алайда аймақ ветеренарлары жағдайдан хабарсыз. Шаруалар өз қотырын өзі қасысын, біз тек аса жұқпалы аурулармен күресеміз дегенді айтады. Тіпті өңірде қотыр ауруының саны да есепке алынбайды екен.
НҰРКЕН БАЯРОВ, ОБЛЫСТЫҚ АУМАҚТЫҚ ИНСПЕКЦИЯСЫ БАСШЫСЫНЫҢ ОРЫНБАСАРЫ:
Аса қауіпті аурулар қатарына жатпайды. Сондықтан ол мал иесінің қаражаты есебінен жүргізіледі. Адамға қаупі жоқ, жыл сайын мал иелері қораға тұрар алдында алдын ала емдік жұмыстар жүргізеді өз қаражаты есебінен. Жүргізбеген соң қотыр болады міндетті түрде. Үкімет тарапынан ешқандай бұған дәрі-дәрмек бөлінбейді.
Шаруалардың шырылы каналдарға су айдайтын мекеме басшылығы да естімепті. Мұз қатқанша насосты тоқтатпадық,- деуден танбады.
АСЛАНБЕК РЫСЖАНОВ,«ТАБИҒАТ» КМК ДИРЕКТОРЫ:
Ол жерде Жайық сияқты толтырып қоя алмаймыз ол суды. Өзінің уақыты бар, желтосқанға дейін біздің насосымыз қосамыз, одан кейін, қаңтар, ақпан, наурыз ол кезде насос қосылмайды. 1 сәуірден бастап насостарды қосып, су жеткізелді. Біз Жайықтың суын алып, жайықтың суын беріп отырмыз, ол жерге басқа суды қосып отырған жоқпыз ғой. Кешегі тасқын суда мал өліп тасталды ма қайдан білеміз?
30 жылдан аса жөндеу көрмеген каналды тазалау, тереңдету жұмысына жобалық-сметалық құжат әзір тұр екен. Жұмыс басталса, көктемде де насос қосылмай, мал шіріген суды ішіп, ауру жамай ма деп уайымдайды шаруалар қауымы.
