Астанада сот баласына қамқорлық көрсетпеген және материалдық қамтамасыз етпеген ер адамды ата-ана құқығынан айырды. Оның 4 миллион теңгеден астам алимент қарызы бар.
Ювеналды соттың мәліметінше, ер адам ресми түрде жұмыс істемеген, 20 жылдан бері құмар ойынға тәуелді, сондай-ақ ұлының өміріне араласу ниеті жоқ екенін мойындаған.
Сот психологының зерттеуіне сәйкес, бала да әкесімен қарым-қатынас орнатуға құлықсыз екенін білдірген.
Сот шешімі бойынша, ер адам ата-ана құқығынан айырылғанымен, алимент төлеу міндетінен босатылмайды. Ол бұрынғыдай қаржылық жауапкершілігін орындауға тиіс. Шешім заңды күшіне енді.
