Былтыр елде 309 млрд теңгеге жиһаз сатылған. Оның 31 проценті отандық тауар өндірушілерге тиесілі. Салаға тартылған инвестиция да, экспорт көлемі де жылдан жылға артып жатыр. Осы және өзге де ақпараттар "Экономика" топтамасында.
Елімізде жиһаз өндірісі өркендеп жатыр. Былтыр 105 млрд теңгенің мүлкі өндіріліпті. Бұл 2023 жылмен салыстырғанда 27 процентке артық. Өткен жылы салаға 6,8 млрд теңге инвестиция тартылған. Соның салдарынан экспорт көлемі 19 пайызға өсіп, 16,8 млн долларға жетті. Өнім негізінен ТМД елдеріне жөнелтілген. Айта кетейік, қазір елде 1791 кәсіпорын жұмыс істеп тұр. Оның 1785-і шағын, 5-і орта, біреуі ірі кәсіпорын.
Қазір жиһазың да, киім-кешек, ішіп-жемің де жарнама арқылы сатылады. Таргетке сұраныс жоғары. Былтыр жарнама нарығы 50 пайызға артып, 760,5 млрд теңгеге жетті. Арнайы агенттіктер 642 млрд теңгеге қызмет көрсеткен. Ал бұқаралық ақпарат құралдары 51 млрд теңгеге жарнама орналастырған. Нарық конъюнктурасын зерттеу және қоғамдық пікірді зерделеу бойынша 66 млрд теңгеге қызмет көрсетілді. Өңірлік бөліністе Алматы көш бастады. 663 млрд теңгеге жарнама жасалған. Бұл нарықтың жалпы көлемінің 87 пайызынан асады.
8-наурыз - халықаралық әйелдер мерекесі ғана емес, гүлдің де жәрмеңкесі. Сұлулық символдары даладан қалаға көшіп келгендей әсер қалдырады. Тәулігіне миллиондаған гүлді ерлер нәзік жандылардың көңілін шат, күйін көктем ету үшін сатып алады. Мамандар мереке қарсаңында гүлге сұраныс 48 процентке артады деп болжауда. Бағасы да 12 пайызға қымбаттайды. Ал раушан мен қызғалдақ құны 25 процентке дейін шарықтауы мүмкін. Қазірдің өзінде гүл сататын кәсіпкерлердің жарнамасы 35 пайызға көбейді.
