Маңғыстау облысы Бейнеу ауданындағы мектептерде жалған құжатпен жұмысқа тұрған мұғалімдер анықталды, деп хабарлайды Orda.kz.
Маңғыстау облысының прокуратурасы жеті педагогтың кәсіптік қайта даярлау туралы жалған куәлікті пайдаланғанын әшкереледі.
Мысалы, олардың бірі – Алматы қаласындағы SDU университетінің атынан жасалған «Педагогика-логопедия» мамандығы бойынша жалған құжат ұсынып, педагог-психолог болып жұмыс істеген.
«Мысалы, «Ә» есімді педагог 2024 жылы наурыз айында SDU University университетінің (Алматы қ.) «Арнайы педагогика» мамандығы «логопед-дефектолог» біліктілігі бойынша қайта даярлау курсынан өткені туралы жалған куәлігін пайдалану арқылы, мектепте «педагог-психолог» лауазымында жұмыс істеген. Ұқсас деректер аудандағы орта білім беру ұйымдарындағы 6 педагогтен анықталды», деп мәлімдеді бас прокуратура.
Сот олардың барлығын ҚР Қылмыстық кодексінің 385-бабының 3-бөлігі («Көрінеу жалған құжатты пайдалану») бойынша кінәлі деп танып, айыппұл түрінде жаза тағайындады.
