Ұлттық банк төрағасы Тимур Сүлейменов 11-12%-бен 10-20 жылға берілетін ипотеканы азаматтар үшін көтере алмайтын ауыртпалық екенін айтты. Бұл туралы Stan.kz ақпарат агенттігі хабарлайды.
Сүлейменовтен брифинг барысында неліктен ипотекалық несие бойынша максималды ставка шегін төмендету ұсынылғанын сұраған. Тиісті жоба "Ашық НҚА" сайтында жарияланған еді.
"Мұны неге дұрыс емес деп есептейміз? Себебі 20% ставкамен берілетін ипотека – жұмыс істемейтін құрал. Тіпті 10-120 жылға 11-12% берілетін ипотека да – көтере алмайтын ауыртпалық. Өйткені соңында жиналған пайызын төлеу мүмкін емес", – деді ол.
Тимур Сүлейменов нарықтық және базалық ставка жоғары болса, нарықтық ипотека банктер үшін де, азаматтар үшін тиімсіз қаржы құралына айналатынын айтты. Сондықтан мемлекет "Наурыз" бен "7-20-25" сынды бағдарламалар енгізу арқылы нақты шаралар қабылдап жатыр дейді.
"Сәйкесінше бізде ипотека бар, бірақ ол мемлекет тарапынан арзандатылуға тиіс. Әйтпесе, 2000-жылдардың мен 2010-жылдардың ортасындағы жағдайды жасауымыз мүмкін. Бұл кезде ипотека алған азаматтардың көбі қарызын төлей алмай қалды", – деп қосты Ұлттық банк басшысы.
Тимур Сүлейменов бүгінге дейін қиын жағдайға тап болған мыңдаған адамның ипотекалық несиесі Ұлттық банк есебінен төленіп келеді дейді.
Сондай-ақ ол қарыз алушылар бастапқыда өз қаржылық жағдайын дұрыс бағаламай, қиындықтарға тап болған. Ал банктер мұндай жағдайлар үшін жауапкершілік алмайды. Сондықтан мемлекет араласып, көмек көрсетуге тура келеді.
"15-20 жылға 20 пайыздан асатын мөлшерлемесі бар нарықтық ипотека рәсімдемей тұрып жеті рет ойлану керек", – деп түйіндеді ол.
