Атырау облысында жарылыс болып, артынша өртке оранған кен орны екі тәуліктен кейін барып сөндірілді, деп хабарлайды Azattyq Rýhy.
«ҚазМұнайГаз» мәліметінше, 2025 жылғы 8 наурыз күні сағат 16:40-та «Ембімұнайгаз» АҚ (ЕМГ) «Жылыоймұнайгаз» МГӨБ Батыс Прорва кен орнындағы №437 ұңғымада газ шығуы толықтай тоқтатылды. Ұңғыма тығындалды, «Ақ Берен» ЖШС әскери авариялық-құтқару қызметінің көмегімен ұңғыманың сағасына әмбебап гидравликалық превентор қойылды.
«2025 жылдың 6 наурызында Батыс Прорва кен орнындағы консервацияда тұрған №437 ұңғымада перфорациядан кейін, сорапты-компрессорлық құбырды (СКҚ) түсіру кезінде газ шығуы орын алды.
Осыған қатысты «Ембімұнайгаз» АҚ жедел штабы құрылып, «Ақ Берен» ЖШС ӘАҚҚ, «Семсер - Өрт сөндіруші» ЖШС, «СОП Атырау» ЖШС мобильді күзет құрылымдары тартылды», - делінген «ҚазМұнайГаз» хабарламасында.
