Қытайдағы Haidilao жылдам тамақтану желісі екі жасөспірімнің сорпаға зәр шығаруынан кейін 4000-нан астам клиентіне өтемақы төлеуде, деп хабарлайды BAQ.KZ тілшісі ВВС агенттігіне сілтеме жасап.
Қытайдың ең ірі Haidilao жылдам тамақтану мейрамханалар желісі Шанхайдағы бір филиалында болған оқиғадан кейін 4000-нан астам келушісіне өтемақы төлеуді ұсынды. Бұл оқиғада екі жасөспірім сорпаға зәр шығарған.
Өткен айда әлеуметтік желілерде кеңінен таралған видеода екі баланың жеке бөлмеде түскі ас кезінде сорпаға зәр шығарғаны көрінеді. Бұл оқиғаны кім түсіргені белгісіз.
Полицияның мәліметінше, оқиға кезінде мас болған 17 жастағы екі жасөспірім көп ұзамай ұсталған.
Ластанған сорпаны біреудің тұтынғаны туралы ешқандай мәлімет жоқ. Haidilao клиенттерден кешірім сұрап, хот-пот дайындайтын барлық жабдықтар мен ас құралдарын ауыстырғанын және басқа ыдыс-аяқты толықтай дезинфекциялағанын мәлімдеді.
Бұл оқиға ақпан айының соңында болғанымен, компания басшылығы бұдан бірнеше күн өткен соң ғана әлеуметтік желілерде видео таралған кезде хабардар болған.
Haidilao оқиға кезінде жұмыс істеген қызметкерлердің жасөспірімдерді тоқтата алмағанын мойындады.
Компания өкілдерінің айтуынша, оқиғаның нақты қай мейрамханада болғанын анықтауға бір апта уақыт кеткен, өйткені Шанхайда олардың ондаған филиалы бар.
Бұл оқиғаның клиенттерімізге келтірген моральдық зиянын ешбір өтемақы толығымен өтей алмайтынын толық түсінеміз, бірақ біз жауапкершілікті толықтай мойнымызға аламыз, - делінген компанияның мәлімдемесінде.
Haidilao мәліметінше, 24 ақпан мен 8 наурыз аралығында сол мейрамханада тамақтанған клиенттерге төленген шоттың толық құны қайтарылады және оған қоса, есептелген сомадан 10 есе артық ақшалай өтемақы беріледі.
Haidilao өз қызмет көрсету деңгейімен және отбасыға жайлы атмосферасымен танымал: мейрамханада әйелдерге маникюр жасалады, ал балаларға мақта кәмпиті ұсынылады. Компания алғашқы мейрамханасын Сычуань провинциясындағы Цзяньян қаласында ашқаннан бері қарқынды дамып, бүгінде әлем бойынша 1000-нан астам мейрамхананы басқарады.
