Оралдық көпбалалы отбасы бұрынғы жанармай қоймасының орнынан салынған үйде тұрып жатыр. Жерге сіңген зиянды қалдықтардың кесірінен балалары аурудан көз ашпайтын көрінеді. Мамандар да мұндағы мазуттың қалыпты көрсеткіштен 4-5 есе көп екенін анықтаған. Өлместің күнін кешкен отбасы енді кімнен көмек сұрарын білмей отыр.
Меңдіғалиевтер отбасы мұнда 20 жыл бұрын қоныстаныпты. Аядай үйде 9 адам тығылысып тірлік етсе де, көрші ауладағы мұнай цистернасынан аққан майдың қалдығы маза берер емес. Майға бөккен аумақта арам шөп те өспейді екен.
АЙСҰЛУ МЕҢДІҒАЛИЕВА, КӨПБАЛАЛЫ АНА:
Балаларымның үстіне жара шығады. Бір емес, екі емес. Екінші баламның аяқтары бір-біріне жабысып, саусақтарын кесіп аяғының аяғы ауыр кезімде сондай дефекті болды дейді. Осының эффектісі ме деп те ойлаймын.
Ауланы тексерткен қоғам белсенділері зиянды қалдықтың көптігін анықтапты.
БАУЫРЖАН ЗӘКИ ЗАҢГЕР, ОБЛЫСТЫҚ ҚОҒАМДЫҚ КЕҢЕСТІҢ МҮШЕСІ:
Кеңес үкіметі кезінде бұл жерде мазут, жанар-жағармай сақтайтын гараж, котельный болған. Әлі күнге ішінде мазут бар. Сондықтан біз бұл жерге санэпидқадағалау шақырдық. Олар хаттамасын жасады. Бұл жерде бензол мен аммиактың үш, төрт, бес есе көп көрсеткіштері бар. Яғни жанар-жағармайдың улы заттары жерге әбден сіңіп кеткен. Мұның барлығы да адам мен әсіресе балалардың денсаулығына өте қауіпті.
Бұл аздай, былтырғы тасқында еріген қар суы үйге кіріп, біраз жерін бүлдірген.
ЕРКІН КАРИН, ТІЛШІ:
Қабырғасын қарғын су қақыратқан үйдің иелері баспанасын айналдыра ағаш отырғызыпты. Бірақ топырақ қабатына жанармайдың қалдықтарының сіңіп кеткені соншалық мына еккен шыбықтарымыз өнім бермейді дейді. Айналдырған 4-5 жылдың ішінде мына он шақты шыбықтан тек екеуі ғана қалыпты. Оның қалған екеуінің өзі биыл солып жатыр.
Әкімнің айтуынша, енді Меңдіғалиевтер үйі апатты тұрғын ретінде кезекке тұруы тиіс. Сонда ғана баспана бұйыруы мүмкін.
МЕЙІРБЕК СҰЛТАНОВ, ПОДСТЕПНЫЙ АУЫЛДЫҚ ОКРУГІНІҢ ӘКІМІ:
Ол кісілер енді тұрғын үйін апатты деп тану үшін жеке техникалық қызмет көрсететін мекемені таңдап, соған үйін көрсетіп, сол кісілер апатты деп таныған жағдайда ғана ұйғарым бере алады. Содан кейін ол кісілерді біздер тұрғын үй кезегіне ресми түрде тұрғыза аламыз.
Айсұлу мектепте еден жуады, жұбайы аула сыпырушы болып жұмыс істейді. Отбасыға көмектескен заңгерлер адам мен бала құқығын қорғайтын уәкілдерге және прокуратураға шағымданған. Енді құзырлылардың жауабын күтіп отыр.
