Астанада инклюзивті спорт орталығының құрылысы басталды. Жаңа нысанның іргетасын қалау рәсіміне Қазақстан бочча федерациясының президенті Мәулен Әшімбаев қатысты. Орталықта бочча, баскетбол, арбамен ойнайтын футбол, голбол, отырып ойнайтын волейбол және тағы басқа спорт түрлеріне арналған залдар болады. Сенат төрағасы инклюзивті орталық мүгедектігі бар спортшылардың алаңсыз жаттығу жасап, жаңа белестерді бағындыруына жол ашатын орынға айналады деп сенім білдірді. Сондай-ақ әр азаматтың өмірден өз орнын табуына, көппен араласып, қарым-қатынас жасауына және бір-бірін қолдауға берілетін зор мүмкіндік екенін айтты.
МӘУЛЕН ӘШІМБАЕВ, ҚР ПАРЛАМЕНТІ СЕНАТЫНЫҢ ТӨРАҒАСЫ:
Президентіміз Қасым-Жомарт Кемелұлы Тоқаевтың бастамасымен елімізде инклюзивті қоғамды дамытуға үлкен мән берілуде. Инклюзивті қоғам дегеніміз – әрбір Қазақстан азаматы үшін тең мүмкіндіктерді қалыптастыру. Әрбір Қазақстан азаматы үшін өзінің әлеуетін жүзеге асыруға барлық керекті мүмкіндіктерді қалыптастыру екені сөзсіз. Осы бағытта елімізде көптеген жұмыстар жүзеге асырылуда.
