Атырауда еліміздегі полиэтилен өндіретін ірі зауыттың құрылысы басталды. Арнайы экономикалық аймақта салтанатты түрде «Силлено» зауытының алғашқы қадасы қағылды. Мұнай-газ химиясы кластерін құру бағытындағы ірі жоба шикізатты терең өңдеу арқылы полиэтилен импортын толықтай алмастырып қана қоймай, еліміздің экспорттық әлеуетін арттыруды көздейді.
Еліміз үшін тарихи сәт. Қазақстан 2024 жылдың өзінде 300 мың тоннаға жуық полиэтилен импорттады, зауыт іске қосылған кезде елімізде жылына 1,25 млн тонна полиэтилен өндірілетін болады. Жаңа зауыт өнеркәсіптің сан-саласында қолданатын 20-дан астам түрін ұсынады. Инвестиция көлемі 7 млрд АҚШ доллардан асатын жоба 2029 жылы іске қосылады.
АСХАТ ХАСЕНОВ, «ҚАЗМҰНАЙГАЗ» ҰК АҚ БАСҚАРМА ТӨРАҒАСЫ:
Еліміз үшін өте үлкен және ауқымды шара. Мемлекет басшысы Қасым-Жомарт Кемелұлының тікелей тапсырмасымен орындалып жатыр. Тек қана полиэтиленді базалық өнім ретінде ғана шығарып қоймай, одан кейінгі келесі тізбектерді яғни полиэтиленді құбырлар, кез-келген мебель, көптеген қазіргі машина жасаудың құрылғылары осы пластиктен шығарылады. Осының барлығы мультипликативті эффектпен еліміздің экономикасына қарқын береді.
Зауыт өнімдерін ТМД елдеріне, Еуропа, Қытай және Түркияға экспорттауды жоспарлап отыр. Полиэтилен өндірісіне шикізат ретінде этан қолданылады. Зауыт пиролиз және этиленді полимерлеу қондырғысынан тұрады.
БАУЫРЖАН АСҚАРОВ, «SILLENO» ЖШС ЭКСПЛУАТАЦИЯ ДЕПАРТАМЕНТІНІҢ КООРДИНАТОРЫ:
Бу крекинг қондырғысы Қазақстанда ешқашан болмаған. Бірінші рет біз салып жатырмыз. Бұның экологиялық жағынан, қауіпсіздік жағынан бұған өте жоба тобымыз көңіл бөлді. Сондықтан біздің алғашқы қазақстандағы бу крекингі қондырғысы, одан кейін салынатын полимерлік газафазалық суспензиялық реакторлар болады.
Зауыт құрылысына 8 мыңнан астам адам тартылмақ. Ал өндіріс басталғаннан кейін 800 тұрақты жұмыс орны ашылады. Компания басшылығы құрылысқа әлемдегі ең озық технологияларды қолданамыз деп отыр.
