Таиландтағы жойқын жер сілкінісінен кейін туристер турлардан жаппай бас тартып жатыр. Соңғы бірнеше күнде ірі қонақ үйлерде бөлме брондаған мыңнан астам турист ақшасын қайтарып алған. Бұл туралы Stan.kz ақпарат агенттігі Reuters басылымына сілтеме жасап хабарлайды.
Сарапшылар енді Таиландқа келушілердің саны уақытша төмендейді деген болжам жасады. Олардың болжамынша, алдағы екі аптада әлемнің түкпір-түкпірінен келетін туристер саны 10-15%-ға азаяды. Өйткені олар жер сілкінісі қайталануынан және жерасты дүмпуі бұрынғыдан да жойқын бола ма деп қорқады.
Сондай-ақ табиғи апаттан Бангкоктағы саяхатшылар арасында танымал сәулет ғимараттары зақымданған. Бұл Таиланд экономикасына қатты әсер етуі мүмкін дейді сарапшылар. Айта кетейік, Таиландта әрбір бесінші адам туризм саласында жұмыс істейді.
