$503.05 €542.99 ₽5.98
×

Тараз көшелерінде маньяктің жүргені рас па?

AstanaTV
02.04.2025ж. 16:16
153
Тараз көшелерінде маньяктің жүргені рас па?
Фото: depositphotos.com

Әлеуметтік желілерде "Таразда балға ұстаған маньяк көшелерді аралап жүр" деген ақпарат желдей есіп, қала тұрғындары үрей құшағында жүр, деп хабарлайды inbusiness.kz тілшісі.

Еске сала кетсек, бірнеше күн бұрын Тараз қаласындағы саябақтардың бірінен ер адамның мәйіті табылған болатын. Әлеуметтік желілерде қаза тапқан адамның құқық қорғау органдарының бұрынғы қызметкері болуы мүмкін деген ақпарат тарады. Алайда Жамбыл облыстық полиция департаменті бұл мәліметке қатысты түсініктеме берген жоқ.

Ал кеше Тараз қаласының орталық көшелерінің бірінен тағы бір ажал құшқан адамның жансыз денесі табылды. Күн құрғатпай қайғылы оқиғалардың жиілеуі тұрғындардың үрейін одан бетер үдете түсті.

Дегенмен Жамбыл облыстық полиция департаментінің баспасөз қызметі жұртшылықтың зәре-құтын қашырған маньякқа байланысты ақпаратты жоққа шығарды.

"Әлеуметтік желіде "Таразда балға ұстаған маньяк байқалды, зардап шеккендер бар" деген ақпарат тарауда. Жамбыл облысының полиция департаменті бұл ақпараттың шындыққа жанаспайтынын хабарлайды. Сондай-ақ, ҚР ҚК-нің 274-бабына сәйкес жалған ақпаратты, оның ішінде әлеуметтік желілер мен мессенджерлер арқылы таратқаны үшін қылмыстық жауапкершілік көзделгенін ескертеміз", - делінген полиция департаментінің хабарламасында.