Елордалық бойжеткен «L» косметологиясының модельдерді іздейтіні туралы жарнаманы көріп, ботокс жасатуға жүгінген, деп хабарлайды turkystan.kz.
Акция аясында процедурада қолданылатын, құны 175 мың теңге тұратын материалдардың құнын ғана төлеу шартымен қызмет көрсетілген.
Процедура жасалғаннан кейін бойжеткен дәрігерге жүгініп, дәрігер оған бұлшық еттердің зақымдалуы, мимика кезінде еріннің ісінуі және асимметриясының бар екендігі туралы қорытынды берген. Көрсетілген сапасыз қызмет нәтижесінде ол физикалық және моральдық зардап шеккен.
Талап қоюшы материалдық шығынды және моральдық зиянның өтемін өндіру туралы талап арызбен сотқа шағымданған.
Жауапкер талап қоюшымен ақылы медициналық қызмет көрсету туралы жазбаша келісім жасамаған, талап қоюшының инвазивті араласуға жазбаша ерікті келісімін алмаған, сондай-ақ қажетті рұқсаттарсыз медициналық қызмет көрсеткен.
Жауапкердің мұндай қызметтер көрсетуге құқығы болмағандықтан, пайдаланылған материалдарды сапалы деп санауға болмайды.
«Тұтынушылардың құқықтарын қорғау туралы» Заңды негізге ала отырып, сот талапкердің талап-арызын қанағаттандыру туралы шешім қабылдады. Жауапкерден материалдық шығын мен 50 мың теңге көлемінде моральдық зиян өндірілді.
Шешім заңды күшіне енді.
