Сергеев қоймасында су тағы көтеріле бастады. Петропавл қаласында төменде орналасқан үй тұрғындары шұғыл түрде қауіпсіз жерге көшіріле бастады. Аймақтағы жағдай туралы тілшіміз Абзал Құрманкин айтады.
Тасқынның бірінші толқыны бірер күнде Петропавлда шарықтау шегіне жетпек. Кеше түнде Есілдің деңгейі 960см-ге, яғни қауіпті көрсеткішке дейін жетіп, облыс орталығының маңайымен өтетін халықаралық маңызы бар тас жолды су басты. Қазір Заречный кентіндегі өзеннің бойында орналасқан саяжайларға қауіп төніп тұр.
Былтыр алапат тасқын кезінде су басқан Былғары зауыт, Ойқала және Мичурин шағын аудандарын оқшаулау үшін әкімдік ұзындығы 6 шақырым бөгет салған. Қазір Заречный кенті ғана осал жерде тұр.
КИРИЛЛ ИВАННИКОВ, СҚО ТЖД АЗАМАТТЫҚ ҚОРҒАУ БАСҚАРМАСЫНЫҢ БАСШЫСЫ:
Заречный кентінде қызыл аумақтың ішінде 500ге жуық саяжай бар. Құзырлы органдар оларға заттарды көшіруге көмек берді. Ал жергілікті билік заттарды сақтайтын арнайы қойма әзірлеп қойды. Осы уақытқа дейін қанша адамның көшірілгені әзірге белгісіз. Ол жерде бақылау жұмыстары күні-түні жүргізіліп жатыр.
Сергеев су қоймасында тасқынның екінші толқыны басталды. Бөгеттің үстімен ағып жатқан судың деңгейі 108 см-ге жеткен.
ДӘУРЕН ҚОСШЫҒҰЛОВ, “ҚАЗГИДРОМЕТ” СҚОФ БӨЛІМ БАСШЫСЫ:
Қазір Ақмола облысында қар еріп жатыр. Сәйкесінше ол су Солтүстік Қазақстан облысына келіп, тасқынның екінші толқынына айналды. Оның суы бірінші толқыннан көбірек болмақ. Алайда, былтырғы жылдай емес әрине. Сергеев су қоймасында судың деңгейі бірер күннен кейін шарықтау шегіне жетеді деп болжап отырмыз.
Облыста 200-ге жуық эвакуациялық бекет әзірленге. Қазір онда 1 ғана адам тұрып жатыр.
