Трампты жамандаймын деп 25 сағат мінберден түспеді. Демократиялық партия өкілі – Кори Букер АҚШ Сенатының отырысында мінберден түспей, үзіліс жасамай сөйлеу бойынша жаңа рекорд орнатты. Ол бір тәуліктен астам уақытты Президент Дональд Трамп пен Илон Максты сынау үшін арнады. Еуропалық Одақ та Трампты кінәлаудан кет әрі емес. Еуропарламент басшысы Трамп салық салса, қарап тұрмаймыз, - деп сес көрсетті. Израиль Ливанға қайта шабуыл жасады. Бірнеше үйді күл-талқан қылып, 3 бейбіт адам қаза тапты. Әлемдегі соңғы жаңалықтарды Еркелді Тілеуқұл шолып шықты.
Трамп саясатын сынаймын деп 25 сағат мінберден түспеді. Сенатор Кори Букер Конгресс отырысында АҚШ Президентін және оның ең жақын жақтасы Илон Макстың жүргізіп жатқан саясаты туралы үлкен баяндама жасады. Оның айтуынша, қос қайраткер әлемдегі ең озық державаны құрдымға итермелеп жатыр.
КОРИ БУКЕР, АҚШ КОНГРЕССІНІҢ СЕНАТОРЫ:
Құрметті партияластарым, барлықтарыңызды бірігуге шақырамын. Себебі, АҚШ демократиясына, халқына үлкен қауіп төніп тұр. Ең жақын одақтастарымыз – Канада мен Гренландияға еліміздің билігі қауіп төндіруде. Бұл бұрын-соңды болмаған сұмдық әрекет. Небәрі 71 күн ішінде АҚШ-тың қаржылық тұрақтылығы мен халқының әл-ауқатына, демократияға қауіп төнді. Біздің елде бұндай жағдай болмауы керек еді. Алдағы 4 жылда не болатынын елестетудің өзі қиын.
Трамптың тайраңдауына жол бермейміз. Еупарламент төрайымы – Урсула Фон Дер Ляйен Кәрі Құрлық та қарымта қайтаруға дайын екенін жеткізді. Себебі, АҚШ Президенті 2 сәуірден бастап, барлық шетиелдік тауарларға салық саламын деп ескертті.
УРСУЛА ФОН ДЕР ЛЯЙЕН, ЕУРОПАРЛАМЕНТ ТӨРАЙЫМЫ:
Еуропа бұл теке-тіресті бастамағанын ескерткім келеді. Еуропалық Одақтағы барлық адамдардың құқығы мен әл-ауқатын сақтауға шамамыз жетеді. Біз – әлемдегі ең үлкен біріккен нарықпыз. Біз АҚШ-пен келіссөздерде өз ұстанымдарымызды батыл қорғай аламыз және ешкімнен қорықпаймыз. Озық технология мен бай нарық бізде де бар.
Израиль қайтадан шабуыл жасады. Бұл жолы Ливанға. Қорғаныс Министрлігінің мәліметінше, Израиль Хезболла лаңкестік ұйымының жоғары лауазымды командирлерінің бірін тауып, сол жерге дронмен шабуыл жасап, көзін жойғанын айтуда. Бірақ, Ливан билігі шабуыл жасалған тұрғын үйде тек бейбіт тұрғындар болғанын және 4 азаматтың қаза тапқанын мәлімдеді.
ХУССЕЙН НУР ЕЛ-ДИН, БЕЙРУТ ТҰРҒЫНЫ:
Бұл жерде ешқандай Хезболла жоқ. Израиль билігі бұны қорқыту үшін немесе еріккеннен істеп отыр деп ойлаймын. Бұл үйде менің досымның отбасы тұрған. Ол өзі қаза тапты. Қайта балалары үйде болмады.
Айта кетейік, Хезболла лаңкестік ұйымы Израильге бірінші болып 2024 жылы шабуылдаған. Алайда, Израильмен өткен жылдың қараша айында бейбіт келісімге қол қойған еді.
