«Зіркілдемей сөйлеңіз!». Мәжіліс депутаттары Парламентке келген министр орынбасарының шаңын қағып алды. Халық қалаулыларына күзет қызметі туралы есеп берген ішкі істер қызметкерінің сөзі жақпай қалса керек. Одан қалды «әр сұраққа қалай болса солай жауап берді» деп ренжіп отыр. Шаңыраққа қараңыз деген мәжілісмендердің министрлік өкілінен ала алмай жүрген не ақысы бар? Даудың басы қайдан шықты? Әріптесім Аружан Задабек толықтырсын.
Депутаттардың бір-біріне дес бермей, делебесі қозып, даурығуы бекер емес. Олар бүгін күзет қызметі ақсап тұр деп ақтарылды. Рас. Алысқа кетпей-ақ мектептегі күйге тоқталайық. Ондағы қарауылдар - алпысты алқымдағандар мен жетпістік жетегін ұстағандар. Депутаттар мұндай жастағы қызметкерлердің өзіне күзететін адам керек дейді.
РИНАТ ЗАЙЫТОВ, ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Күзетте 60-қа тақап қалған апалар немесе 70-ке тақап қалған аталар отыр. Олардың өзіне күзетші керек қой.
Бізде күзетші жасына қатысты талап жоқ емес, бар. 19-дан асуы тиіс. Бірақ неше жасқа дейін қызмет атқара алатыны реттелмеген. Ішкі істер министрлігі бұл мәселе заңда шегелеп жазылмаса да, әр ұйым өз талабын қоюына болады дейді.
ИГОРЬ ЛЕПЕХА, ҚР ІШКІ ІСТЕР МИНИСТРІНІҢ ОРЫНБАСАРЫ:
Әр мектеп директорының күзетшіні таңдау кезінде қандай да бір талап қоюына толық құқығы бар.
Бұл мәселенің күн тәртібінен түспей, ата-ананың басты алаңдаушылығына айналғалы қашан?! Біздің редакция да талай рет көтеріп, түйіткілдің тарқалуын талап еткен. Арнайы эксперимент түсіріп, мектептерді аралап та көрдік. Турникет тұрса да, ішке емін-еркін кіріп, қалағанымызша жүргеніміз есте. Тіпті, қарауыл «кімсің, кімге келдің» деп сұрамады да.
Елде 4300 күзет ұйымы бар. Оның 1600-не қару қолдануға рұқсат. Биыл 1186 компания лицензиясынан айырылды. Бірақ олардың бірде-бірі қолдағы суық жарақтарын мемлекетке өткізбеген. Мұнан келетін қауіпті ескере беріңіз енді.
ЖАРҚЫНБЕК АМАНТАЙҰЛЫ, ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Қазіргі қолданыстағңы заңның аясында оларды өткізу жоқ. Енді мына заң қабылданса, оларды бақылауға алу және ісшкі істер министрлігіне өткізу қолға алынады.
Олардың қолындағы қарудан күдіктеніп отырғанымыз жайдан-жай емес. Бізде ел күзетеді дегендер, керісінше, қатыгездікке барып, қолын қанға малып жатады. Өкінішті, әрине. Мұндай оқиғалардың түнгі клубтарда бірнеше рет орын алғаны депутаттардың да есінде екен.
СЕРГЕЙ ПОНОМАРЕВ, ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Бұқаралық ақпарат құралдарынан күзет қызметкерлерінің қатысуымен болған қылмыстар туралы жиі естиміз. Мәселен, Астанада жеке күзет ұйымының қызметкері тұрғынды ұрып кетті деген секілді.
Мектеп, аурухана, театр, мешіт. Бұл- террористер үшін ең қолайлы орын. Адам көп жиналады деген бергі жағы, оған күзеттің нашарлығын қосыңыз. «Жаман айтпай жақсы жоқ». Егер зіңгіттей жігіттер жермен-жексен етсе, жасы біразға жақындаған жұмысшылар оларға қалай тойтарыс береді? Ойланатын мәселе, иә? Сондықтан депутаттар жаңа норма арқылы күзет қызметкерлеріне ортақ талап бекітуді ұсынып отыр.
