Бүгін - Бүкіләлемдік аутизм мәселесі туралы ақпарат тарату күні. Қазақстанда аутизмге шалдыққан балалардың саны соңғы 5 жылда 5 есе өскен. Оның алғашқы белгілерін ата-аналардың бірі білсе, бірі білмейді. Атаулы күнге орай Ұлттық балаларды оңалту орталығының қызметкерлері аутизмді анықтау мен емдеудің тәсілдерімен бөлісті. Дәрігерлер ауруды ерте кезінде, яғни, 6 айдан 1 жасқа дейінгі уақытта анықтаса жақсы нәтижеге қол жеткізуге мүмкіндік барын айтады.
АЙНАЗ ҚАЗБЕКОВА, ҰЛТТЫҚ БАЛАЛАРДЫ ОҢАЛТУ ОРТАЛЫҒЫ ТҮЗЕТУ-ӘДІСТЕМЕЛІК БӨЛІМІНІҢ ПСИХОЛОГІ:
Егер де бала бір жасқа дейін өзінің есіміне қарамаса, көзге тік қарамаса, балалармен ойнамаса, ойыншықтарды қатарға тізіп ойнаса міндетті түрде біз невропатологтардың көмегіне жүгінуіміз керек. Одан кейін психолог, психиатр мамандарының көмегіне жүгінуін ата-аналардан өтініп тұрып сұраймыз.
Аутизмі бар балалар ерекше күтімді қажет етеді. Дегенмен, Қазақстанда аутизмді емдеу үшін қандай да бір дәрі-дәрмектер қолданылмайды. Әзірге балаға көмек берудің жалғыз жолы – психокоррекциялық орталықтарға апару.
АИДА ТЕМІРҒАЗИЕВА, ОРАЛ ҚАЛАСЫНЫҢ ТҰРҒЫНЫ:
Ана ретінде тілегім – осындай балалар аз болсын деймін және де реабилитационный центрлар көп болсын деймін. Себебі, Қазақстанда мұндай балалар өте көп. Балаларымыз ауырмай, тек жақсы болсын деп тілеймін.
